Qaraǵandydaǵy qarjy pıramıdasyna qatysty is boıynsha kompanııa basshysy tutqyndaldy
QARAǴANDY. QazAqparat - Qaraǵandyda qarjy pıramıdasymen baılanysty is boıynsha «FınansOpto grýpp» JShS-nyń basshysy alaıaqtyq jasady degen kúdikpen tutqyndaldy, dep habarlaıdy QazAqparat.
«Qaraǵandy qalasy Oktıabr aýdandyq soty 2016 jyldyń 18-qazany kúni atalmysh kompanııa basshysy Elena Kolesnıkovany eki aıǵa tutqyndaý týraly qaýly shyǵardy»,-dep habarlady aýdandyq sottyń baspasóz qyzmetinen.
Bul is boıynsha japa shekkender quzyrly organdarǵa shaǵymdandy, shyǵyn 100 mln teńgeni qurady.
Aıta keteıik, jýyrda Qaraǵandy qalasynda «FınansOptoGrýpp» JShS-men baılanysty qarjy pıramıdasyn qurý áreketi boıynsha shý shyqty. Uıym ókilderi turǵyndarmen birge qyzmet etemiz jáne mol kólemde kiris tabasyzdar degen jeleýmen azamattardyń qarjylaryn jymqyrǵan.
«Ekinshi jaq (árqaısysy ártúrli somada) «FınansOptoGrýpp» JShS-na tıesili «Optovka» bólimin damytý úshin 1-shi tarapqa qaıtarymdy negizde mol kólemde qarjy usynady. Al 1-shi tarap ekinshi jaqqa qaıtarymsyz taýarlar men qyzmetterdi jáne qarjy usynady»,-delingen kelisimde.
Al, fırmanyń jabylyp qalǵanyn azamattar keıin bilgen de quqyq qorǵaý organdaryna shaǵymdanǵan. Oktıabr aýdandyq prokýratýrasy JShS-nyń qyzmetine tekserý júrgizdi.
Fırmanyń jarǵysy boıynsha uıym qurylys-montajdyq jumystarymen jáne saýdamen aınalysýy kerek.
Qarjy pıramıdasyn qazir quqyq qorǵaý organdarynyń ókilderi de tekserýde.
