Qaraǵandydaǵy qala turǵyndaryna dárigerler tegin keńes berdi
QARAǴANDY. QazAqparat - Búgin Qaraǵandydaǵy saýda úılerdiń birinde qala turǵyndary dárigerlerdiń tegin keńesin aldy. Qaraǵandylyqtardy mamandar «Biz densaýlyqty tańdaımyz!» aktsııasy aıasynda qabyldady, dep habarlaıdy QazAqparat tilshisi.
Kelýshilerge jalpy tájirıbe dárigerleri, terapevter, pedıatrlar, salaýatty ómir saltyn qalyptastyrý jáne durys tamaqtaný boıynsha mamandar keńes berdi. Munda adamdar qan qysymyn, salmaǵyn, boıyn, qant pen holesterınin tegin ólshete aldy. Jarty kúnde aktsııaǵa oblys boıynsha 2,5 myń adam kelip qatysty, deıdi oblystyq densaýlyq saqtaý basqarmasynyń baspasóz qyzmeti.
Qabyldaýdy «Qaraǵandy oblysynyń jastar jáne balalar uıymdarynyń odaǵy» JQB qoldaýymen № 1, №3 jáne №4 emhanalardyń dárigerleri júrgizedi.
Aktsııa aıasynda sondaı-aq qaraǵandylyqtarǵa mindetti áleýmettik medıtsınalyq saqtandyrý týraly baıandalady.
«Biz densaýlyqty tańdaımyz!» aktsııasy búgin Qaraǵandy oblysynyń Saran, balqash, Temirtaý, Jezqazǵan jáne Abaı qalalarynda da uıymdastyryldy.
