Qaraǵandydaǵy Halyqaralyq robototehnıka festıvaline 6 jasqa deıingi balalar qatysady

QARAǴANDY. QazAqparat - 29-30 naýryz kúnderi Qaraǵandyda Robototehnıka, baǵdarlamalaý jáne ınnovatsııalyq tehnologııalar boıynsha halyqaralyq festıval ótedi. Bul týraly oblys ákimdiginiń resmı saıtynda habarlandy.

Festıvaldi Qaraǵandy oblysynyń Bilim basqarmasy Halyqaralyq sporttyq jáne bilim robototehnıkasy qaýymdastyǵynyń, Kazdidac qaýymdastyǵynyń, demeýshiler men seriktesterdiń qoldaýymen uıymdastyrýda.

2018 jyly ótken festıvalde qatysýshylar men sanattar jóninen rekordty kórsetkishterge qol jetkizilgen bolatyn. Bıyl RoboLand formatyn ózgertip otyr. Mereıtoılyq, besinshi festıval «Energııa. Jańa mazmun. Barlyǵy - bes!» shyǵarmashylyq uranymen ótedi.

Jarys 13 sanat boıynsha uıymdastyrylady.

«Festıvalge deıin irikteý kezeńderi ótkizildi. Tek Qaraǵandy oblysynda ǵana qalalyq jáne aýdandyq jarystarǵa 1 myńǵa jýyq bala men jasóspirimder qatysty. Jeńimpazdar RoboLand-qa joldama aldy», - delingen habarlamada.

Atap ótilgendeı, RoboLand V festıvaline 300-ge jýyq komanda tirkeldi. Bul 600-den astam adam. Qatysýshylar Nur-Sultan, Almaty, Shymkent qalalary men respýblıkanyń barlyq oblystarynan, sondaı-aq Reseıdiń tórt óńirinen: Tomsk oblysy, Chelıabınsk, Novokýznetsk (Kemerovo oblysy), Tolıattı (Samara oblysy), Ózbekstan (Tashkent qalasy) men Italııadan (Sicily, Pachino) keledi.

Sondaı-aq shara barysynda RoboLand-Friendship biregeı kategorııasynyń tusaýkeserin ótkizý josparlanǵan. Festıval úshin ony qaraǵandylyq mamandar ázirlegen. Jarys Dostyq qaǵıdatyna negizdelgen. Bul kategorııany ıtalııalyq komanda tańdady.

Taǵy bir jańa sanat - AGRO CITY FARMING. Festıvalde alǵash ret bıoınjenerııa salasyndaǵy jobalar baıqaýy ótedi.

Budan bólek, bıyl mektep jasyna deıingi balalar sany artyp otyr.

STEM ROBOT MOUSE sanatynda 4-6 jastaǵy balalar kiretin 18 komanda jarysady.

Jarystyń bas tóreshisi - Halyqaralyq sporttyq jáne bilim berý robototehnıkasy qaýymdastyǵynyń prezıdenti Maksım Vasılev (Máskeý q.).

Tórelikti táýelsiz kásibı alqa júzege asyrady. Qorytyndy elektrondy tásilmen shyǵarylady.

RoboLand festıvali Qaraǵandyda 2015 jyldan beri ótkizilip keledi. 2016 jyldan bastap ol halyqaralyq mártebege ıe boldy. Osy jyldar ishinde Qaraǵandyda festıvalge Reseı, Qyrǵyzstan, Sırııa, Polsha komandalary qatysty.