Qaraǵandydaǵy gımnazııa aýmaǵynda Ahmet Baıtursynulyna eskertkish ornatyldy
Memorıal avtory – Qarqaraly aýdanynyń memlekettik muraǵatynyń basshysy Manarbek Kárim.
Avtordyń aıtýynsha, eskertkishti daıyndaýǵa ol bir aptaǵa jýyq ýaqyt jumsaǵan. Ol ásirese materıal izdeýge kóp ýaqyt ketkenin aıtady.
«Eskertkishtiń tasyn biz Qarqaraly aýdanynda ornalasqan Qorǵantas taýynan ákeldik. Monýmenttiń eni – 1,2 metr, bıiktigi – 2,7 metr. Onyń salmaǵy shamamen 2 tonna. Tutas tastan qalanǵan eskertkish Qarqaralyda jasalyp, keıin Qaraǵandyǵa kóshirildi. Ádette men kishigirim tapsyrystarmen aınalysatynmyn, petroglıfter saldym. Maǵan ulym kómektesetin, qazir ol áskerde. Ol sýretterdi saldy, men tasty kesýmen aınalysamyn. Bul joly bárin jalǵyz ózim jasadym, maǵan ol ońaıǵa soqqan joq», - deıdi Manarbek Kárim.
Mektep-gımnazııa aýmaǵynda eskertkish ornatýǵa belgili aqyn jáne aıtysker Aıtbaı Jumaǵul bastamashy boldy.
«Ahmet Baıtursynulyna qarap, balalar uly ǵalym men pedagogqa teńesetin bolady. Dál osy maqsatta biz gımnazııa aýlasyna eskertkish ornatýdy qolǵa aldyq», - dedi Aıtbaı Jumaǵul.
«Mektep oqýshylary bolǵan kezimizde bizdiń oqý ornymyz Ult ustazy Ahmet Baıtursynulynyń esimimen atalady, onyń beınesi máńgi saqtalady jáne osy mektepte balalar qazaq tilinde bilim alady dep oılamaǵan edik. Munyń bári elimizdiń táýelsizdiginiń arqasynda múmkin boldy. Ahmet Baıtursynuly bolashaq urpaqtyń erkin jáne bilimdi bolýyn kóksedi», - dedi eskertkish ashylǵan kezde qalalyq bilim bóliminiń basshysy Esentaı Áshim.
Eskertkishti ashý qurmetine gımnazııanyń 4-synyp oqýshysy Ahmet Qaıyrtaev ıe boldy. Ol lıngvıst-ǵalymnyń bir shyǵarmasyn jatqa oqyp, jınalǵandardy tebirentti.
Mektep-gımnazııa 1964 jyly salynǵan. Ahmet Baıtursynulynyń esimi oǵan 2018 jyly berildi, búgingi kúni gımnazııada 500 bala oqıdy.
