Qaraǵandydaǵy farmatsevtıka kesheninde «Spýtnık V» vaktsınasy qalaı ázirlenedi
QARAǴANDY. QazAqparat – Qaraǵandy farmatsevtıkalyq kesheninde (QFK) COVID-19 qarsy ázirlengen «Spýtnık V» vaktsınasy qatań baqylaýdan ótkiziledi. Mekemeniń bas dırektory Sergeı Baron osylaı málim etti, dep habarlaıdy QazAqparat tilshisi.
QFK bazasynda vaktsına óndirý týraly sheshim QR Densaýlyq saqtaý mınıstrliginiń komıssııasy jáne Reseıdiń Tikeleı ınvestıtsııalar qorynyń (RTIQ) qazaqstandyq farmatsevtıkalyq kásiporyndarǵa sapary jáne ınspektsııalary nátıjesinde qabyldandy. Sarapshylardyń derekteri boıynsha QFK reseılik sýbstantsııadan daıyn nysandy óndirýge anaǵurlym daıyn bolyp shyqty. RTIQ (Reseı) mamandary ótkizgen tehnıkalyq aýdıt óndiristik alańnyń koronavırýsqa qarsy vaktsınanyń daıyn túrin shyǵarý úshin barlyq talaptarǵa sáıkes keletinin rastady.
Búgingi tańda Qaraǵandy farmatsevtıkalyq kesheni (QFK) halyqaralyq GMP standartyna sáıkes bıotehnologııalyq preparattardy óndirýge mamandandyrylǵan, barlyq qajetti ınfraqurylymǵa ıe, jetekshi álemdik óndirýshilerdiń tehnologııalyq jáne zerthanalyq jabdyqtarymen jabdyqtalǵan Qazaqstandaǵy alǵashqy jáne ázirge jalǵyz farmatsevtıkalyq kásiporyn.
Reseılik «Spýtnık V» vaktsınasyn óndirýshi QFK-da vaktsına óndirisiniń lıtsenzııalary bar jáne noý-haý ıesi RTIQ-men seriktestik qarym-qatynas ornatqan.
«Biz RTIQ jetkizetin shıkizattan (farmatsevtıkalyq sýbstantsııa) daıyn vaktsına shyǵaramyz. QFK menshikti zerthanasy jáne vaktsına jasaýshy - Máskeýdegi Gamaleıa atyndaǵy Ǵylymı-zertteý ınstıtýtynyń zerthanasy sapany baqylaýdy júzege asyrady. Qatań baqylaýdan ótkennen keıin vaktsına QR Densaýlyq saqtaý mınıstrliginiń biryńǵaı dıstrıbıýtoryna jetkiziledi. Preparatty ári qaraı alyp júrý - farmakologııalyq qadaǵalaý bizdiń mindetimizge kiredi. Onyń ishinde unamsyz qubylystardy monıtorıngileý, patsıentterdiń ótinishi men shaǵymyn jınaý, taldaý kiredi.
Qaraǵandy farmatsevtıkalyq kesheninde COVID-19 qarsy vaktsına óndirý – Qazaqstan halqy úshin basym mánge ıe strategııalyq mańyzdy áleýmettik joba. Bul óndiris joǵary tabysty emes, sebebi satý baǵasy tek óndiris shyǵyndaryn jabady. Alaıda, vaktsına óndirisiniń basty maqsaty kommertsııalyq paıda kórý bolmaǵandyqtan, vaktsınany erekshe jaǵdaılarda, ıaǵnı paıdany eskerýsiz shyǵarý týraly sheshim qabyldandy», - dep málimdedi «Qaraǵandy farmatsevtıkalyq kesheniniń» bas dırektory Sergeı Baron.
Joba memleketaralyq kelisimderdiń nátıjesinde júzege asyryldy. Oǵan eki memleket úkimetteri men QR Densaýlyq saqtaý mınıstrligi tikeleı jetekshilik etedi. QR DSM men RTIQ arasynda reseılik vaktsınanyń 2 mln dozasyn jetkizý týraly memorandýmǵa qol qoıyldy. Qol jetkizilgen ýaǵdalastyqqa sáıkes, 2021 jyldyń maýsymyna deıin vaktsınanyń qajetti kólemin óndirý josparlanyp otyr. Qazirgi ýaqytta QR DSM men QFK arasynda tıisti kelisim jasasý boıynsha jumys júrgizilýde.
QFK – bul jańa farmatsevtıkalyq tehnologııalarǵa sáıkes jeke ınvestıtsııalar úshin jabdyqtalǵan Qazaqstan-Reseı birlesken kásiporny. Investorlar tarapynan aldyńǵy qatarly farmatsevtıkalyq keshendi jabdyqtaýǵa 50 mıllıon dollardan astam qarjy jumsaldy. Maqsaty - qazaqstandyq patsıentterdi emdeý úshin ómirlik mańyzdy dárilik preparattar óndirisin oqshaýlaý, sonymen qatar, bul úshin jetekshi reseılik ǵylymı zerthanalardyń quzyreti tartylǵan.
QFK jyl saıyn jetkiziletin dári-dármekterdiń tizbesin keńeıte jáne is júzinde bizdiń elimizdiń turǵyndary úshin strategııalyq mańyzdy baǵytta ımportty almastyrý baǵdarlamasyn júzege asyra otyryp ómirlik mańyzy bar dári-dármekterdi QR Densaýlyq saqtaý mınıstrliginiń qajettilikteri úshin jetkizýdi iske asyrady. QFK onkologııa, gemofılııa, gepatıt, qant dıabeti jáne basqalary sııaqty áleýmettik mańyzy bar kúrdeli aýrýlardy emdeýge arnalǵan zamanaýı preparattardy shyǵarady. Osy oraıda, 2020 jyldyń sońyna qaraı farmatsevtıkalyq keshen sońǵy bir jyldyń ózinde 20-ǵa jýyq jańa preparatty shyǵarýdy ıgerip, 60 túrli dárini óndirdi.
Qazaqstanda buryn óndirilmegen birqatar dári-dármekter jelisin keńeıtý jáne ımportty almastyrý úzdiksiz jalǵasýda. Preparattar QR Densaýlyq saqtaý mınıstrliginiń biryńǵaı memlekettik dıstrıbıýtory «SQ-Farmatsııa» kompanııasyna jetkiziledi. Buryn sheteldik óndirýshiler jetkizgen preparattar baǵasynyń tómendeýinen elimizdiń bıýdjetinen osy maqsattarǵa jyl saıyn 1 mıllıard teńgeden astam qarajat únemdeıdi.
Sonymen qatar, QFK Qaraǵandy oblysyndaǵy eń iri salyq tóleýshiler men jumys berýshilerdiń biri, kásiporynda 200 jumys orny uıymdastyrylǵan. QFK-da joǵary tehnologııalyq farmatsevtıkalyq ónimderdi óndirý salasynda bilim men tájirıbege ıe joǵary sanatty mamandar toby (QFK mamandarynyń 99%-y - QR azamattary) jınalǵan.
