Qaraǵandydaǵy burynǵy áskerı qalada eko-aýyl, demalys aımaqtary salynady
PRIOZERSK. QazAqparat - Qaraǵandy oblysynyń Prıozersk qalasynda týrızm salasynda birneshe joba júzege asyrylýda. 2020 jyly eki demalys aımaǵy, eko-aýyl úlgisinde keshen ashý josparlanýda, dep habarlaıdy QazAqparat tilshisi.
«Balqash Týrızm 2019» forýmy aıasynda qazaqstandyq jáne reseılik týragentter men týroperatorlar Prıozersk qalasy týraly málimet beretin aqparattyq týrǵa qatysty. Qatysýshylar Balqash kýrorttyq aımaǵyna kiretin qalamen tanysty. 15 jyl buryn Prıozersk jabyq áskerı qala bolatyn. Qazir ol Sary-Shaǵan polıgonynyń ákimshilik ortalyǵy bolyp tabylady.
Qonaqtar polıgonnyń murajaıy ornalasqan jergilikti ofıtserler úıin kórdi. Sodan keıin olar «Balqash» emdeý-saýyqtyrý kesheninde bolyp, qyzmettermen tanysty. Qala ákimi Qaırat Qamzın Prıozersk aımaǵynyń tusaýkeserin ótkizip, óńirdiń týrıstik áleýetimen tanystyrdy.
«Qalada búginde syıymdylyǵy 260-qa deıin oryndy qamtıtyn 229 jalpy nómiri bar 6 qonaq úı jumys isteıdi. Sonymen qatar, týrıster hostelderge jáne shaǵyn qonaq úılerge qonystana alady. 2014 jyldan bastap «Balqash» emdeý-saýyqtyrý kesheni jumys isteıdi. Qalanyń bas jospary ázirlendi. Ol egjeı-tegjeıli josparlaý jobasymen biriktirilgen. Rekreatsııalyq-saýyqtyrý sektorynyń bos jatqan ýchaskelerinde demalys aımaqtaryn salý kózdelip otyr», - dedi ol.
Qala ákimi týrıstik nysandar qurylysyna jer telimderi bólingenin de aıtty.
«Demalys aımaǵyn salýǵa jer telimin bólýdi surap, bizge Alakólde týrıstik obektileri bar kásipker ótinish bildirdi. Bul másele sheshildi jáne ótken jyly Balqash Varadero kesheniniń qurylysy bastaldy. Kelesi jyly ony paıdalanýǵa berý josparlanýda», - deıdi Qaırat Qamzın.
Ol 2020-2021 jyldarǵa josparlanǵan basqa da jobalardy atap ótti. Jańa nysandar qatarynda eko-aýyl úlgisindegi keshen, taǵy bir demalys aımaǵy, eki qonaq úı bar.
«Granıt» qonaq úı kesheni de keńeıtiledi. Ótken jyly burynǵy jataqhanany qaıta jańartqannan keıin qalada jumysqa jáne demalysqa keletinderge arnalǵan jaıly qonaq úı ashylǵan bolatyn. Joba «Bıznestiń jol kartasy - 2020» baǵdarlamasy boıynsha «Damý» qory arqyly nesıeni sýbsıdııalaý túrinde memlekettik qoldaýǵa ıe boldy. Al qazir kásipker qonaq úıin ári qaraı jetildirýdi josparlap otyr.
Qala ákiminiń aıtýynsha, sońǵy jyldary týrızm salasyndaǵy qyzmetterdiń ósýi baıqalady. 2018 jyly bul sala boıynsha kórsetkish 115 mln teńgeni quraǵan.
