Qaraǵandydaǵy «Besoba» TK-degi úılerdi qabyldaǵan taǵy eki sheneýnikke aıyptar taǵyldy
QARAǴANDY. 24 tamyz. QazAqparat - Qaraǵandydaǵy «Besoba» TK-degi úılerdiń opyrylyp qulaýyna baılanysty qylmystyq ister boıynsha aıyptalýshylardyń tizimi tolyqty, dep habarlady Qaraǵandy oblystyq prokýratýrasynyń baspasóz qyzmetinen.
«Qazirgi ýaqytta «Besoba» TK-niń memlekettik qabyladý komıssııasynyń tóraǵasy Sergeı Grebenşıkov pen onyń orynbasary Tatıana Gýkka qatysty aıyptaýlar boıynsha № 12358801100010 istiń tergelýi aıaqtaldy. 2012 jyldyń 24 tamyzynda olarǵa QR QK-niń 307 babyndaǵy 4 bólimimen («Aýyr zardaptarǵa ákelip soqtyrǵan qyzmettik ókildigin teris paıdalaný») qarastyrylǵan túpkilikti aıyptar taǵyldy», - delingen oblys prokýratýrasynyń baspasóz qyzmeti taratqan habarlamada.
Prokýratýranyń aqparatynsha, aıyptalýshylarǵa aldyn ala tergeýdiń aıaqtalýy týraly habarlanyp, tanysý úshin is materıaldary usynyldy.
Buryn habarlanǵandaı, osyǵan uqsas aıyptaýlar memlekettik qabyldaý komıssııasyn basqarǵan Qaraǵandy ákiminiń burynǵy orynbasary, Saran qalasynyń qazirgi ákimi Vıktor Ivanov pen úıdi qabyldaý kezinde memlekettik qabyldaý komıssııasy basshysynyń orynbasary bolǵan Dáýlet Altynbekovke aıyptar taǵyldy.
QR QK-nie sáıkes atalǵan qylmys úshin 8 jylǵa deıin bas bostandyǵynan aıyrylý jazasy qarastyrylǵan. Budan basqa, 7 jylǵa deıin belgili bir qyzmetterde otyrý nemese belgili bir jumyspen aınalysý quqyǵynan aıyrý jazasy qarastyrylǵan.
Esterińizge sala keteıik, 6 sáýirde Qaraǵandydaǵy «Besoba» TK-degi 5 qabatty úıdiń 4 kireberistik blok-sektsııasy opyrylyp tústi. Bul úı úsh jyl buryn úleskerlerdiń qatysýymen salynǵan edi. Buǵan deıin, atalmysh turǵyn úıde 1 sáýir kúni salmaq túsetin negizgi qurylys konstrýktsııalary buzylǵan bolatyn. Apatty úıden 138 adam kóshirildi. Qaraǵandy ákimdiginiń 3 sáýirdegi ókimimen úıge TJ rejımi engizildi.
TJ saldarynan bolǵan shyǵyn 545,3 mln. teńgege baǵalandy. Sonyń ishinde joıylǵan páterlerdiń baǵasy 328,8 mln. teńge boldy.
Úıdiń opyrylyp qulaýy faktisimen qurylysshylarǵa, jobalaýshylarǵa, memlekettik qabyldaý komıssııasynyń tóraǵasy men múshelerine, sondaı-aq memlekettik sáýlet-qurylys baqylaýyn júrgizgen qyzmettik tulǵalarǵa qatysty tórt qylmystyq is qozǵaldy. Sot sanktsııasymen Qaraǵandy ákiminiń burynǵy orynbasarlary Vıktor Ivanov pen Sergeı Grebenşıkov, memlekettik sáýlet-qurylys baqylaý oblystyq basqarmasynyń burynǵy bastyǵy Aleksandr Vorobev qamaýǵa alyndy.
Qazirgi kezde zardap shekken úleskerlerge qala bıligi jańa úıler berdi. Osy eki arada «Besobadaǵy» basqa barlyq turǵyn úıler apatty tanyldy. Búkil keshendi buzyp, onyń ornynda jańa kópqabatty úılerdi salý sheshimi qabyldandy.
Bul úıdiń qurylysymen aınalysqan «Servıspromsnab» JShS-niń dırektory Andreı Malıanovqa qatysty qarjy polıtsııasy úleskerlerdi aldaý faktisimen qylmystyq isti tergeýde. Aldanǵan klıentterdiń aqshalaryn ózimen birge alyp ketken kompanııanyń basshysyna izdeý jarııalandy.
