Qaraǵandydaǵy balalar úıinde robototehnıka jáne baǵdarlamalaý mektebi ashyldy
QARAǴANDY. QazAqparat –Qaraǵandydaǵy múmkindigi shekteýli balalarǵa arnalǵan balalar úıiniń tárbıelenýshilerine robototehnıkanyń qyzyqty álemi ashyldy. Metsenattardyń biri kabınetti tolyǵymen jabdyqtady, dep habarlaıdy QazAqparat tilshisi.
Sabaqtardy sertıfıkattalǵan jattyqtyrýshylar júrgizedi. Jarty jyl ishinde ne úırengenderin balalar ózderiniń alǵashqy chempıonattarynda kórsetti.
«Ótken jyldyń jeltoqsan aıynda balalar úıinde sabaq bastadyq. Robototehnıka kabıneti mekeme basshylyǵy men demeýshiniń qoldaýymen quryldy. Jıhaz, kompıýterler men barlyq qajetti jabdyqtardy satyp aldyq. Tórt top – 25 bala jınaldy. Jasy ártúrli – 11 jastan 18 jasqa deıin.
Tehnıkalyq shyǵarmashylyqqa uldar da, qyzdar da qyzyǵýshylyq tanytty. Bári eń qarapaıymynan bastaldy: LEGO-qurastyrý, Robot Mouse. Birte-birte mindetter arta tústi. Búgin chempıonatta balalar nátıje kórsetýde. Bul jarys joǵary deńgeıdi ıgergen balalarǵa arnaldy», – deıdi Qaraǵandy qalasynyń robototehnıka jáne RoboClub baǵdarlamalaý mektebiniń jetekshisi Elena Vafına.
Baǵdarlama eń úzdik joba konkýrsyn, teorııany bilýdi, labırınt qozǵalysyn baǵdarlamalaýdy, sondaı-aq sýmo robottarynyń jekpe-jegin qamtydy.
«Eshqandaı jeńildik bolǵan joq. Oqý barysynda balalar óz komandalarynda jumys istedi. Búgin biz olardy ártúrli komandalarǵa bóldik, ıaǵnı ádettegi qalyptarynan aıyrdyq. Ár jarysta kútpegen sátter bolýy múmkin. Sondyqtan bul jerde komandalyq rýh mańyzdy», – dedi Temirtaý qalasyndaǵy Áýbákirov atyndaǵy gımnazııa muǵalimi, sýdıa Aleksandr Dronov.
Balalar úıinde ol Arduino baǵdarlamalaý sabaqtaryn júrgizedi. Osy tehnologııanyń kómegimen aqyldy qurylǵylar jasaýdy úıretedi.
Jeke dáristerdi tehnıkalyq jaǵynan damyǵan eki jigit – onynshy synyp oqýshysy Andreı Dovgal jáne mektep túlegi Aleksandr Potapov alady.
Aleksandrdyń aıtýynsha, ol óziniń alǵashqy qarapaıym elektrondy qurylǵysyn 9 jasynda jasaǵan. Al qazir IT – salasyndaǵy mamandyqqa túskisi keledi.
Andreıdiń pikirinshe, robototehnıkamen aınalysý tek tehnıkalyq bilim ǵana emes, sonymen qatar senimdilik sezimin de syılaıdy.
«Basynda buryn kórmegen jańa nárseden qorqynysh paıda boldy. «Qolymnan eshteńe kelmese she?» degen suraq týyndady. Biraq ár qadam ózime degen senimdilikti arttyra tústi. Mı kóp nárseni qalaıdy jáne ári qaraı júrgisi keledi.
Muqııat bolý kerek, máseleniń sheshimin tabý kerek. Eger aldyńyzǵa maqsat qoısańyz, ony sońyna deıin jetkizý kerek», – dep bólisti jas baǵdarlamashy.
«Robototehnıka balalarǵa ne beredi?», - degen saýalǵa áleýmettik jobanyń qatysýshysy, psıholog Darıa Dıakova jaýap berdi. «Bul qyzyqty jáne paıdaly ǵana emes. Maman kommýnıkabeldilik, zeıin, logıka, oılaý, qııal sııaqty mańyzdy qasıetterdiń damýyna yqpal etedi», - deıdi ol.
Chempıonat qorytyndysy boıynsha tek úzdik komanda ǵana marapattalyp qoımaı, sonymen qatar barlyq qatysýshylar júldeler aldy. Olarǵa uıaly telefondar, qulaqqaptar jáne power bank syıǵa tartyldy.
Joba áli de jalǵasýda.
«Jazǵy demalystan keıin sabaqty qaıta bastaımyz. Bizdiń maqsatymyz – balalar
halyqaralyq deńgeıge deıin túrli deńgeıdegi jarystarǵa qatysýy úshin ary qaraı qadam basý», – deıdi Elena Vafına.
