Qaraǵandydaǵy balabaqsha daýy: Edenge kafel tóseýge tyıym salyndy
Eske sala keteıik, Qaraǵandy qalasynda jekemenshik balabaqshanyń birinde búldirshinniń kafeldi edenge qulaǵan vıdeosy áleýmettik jelide daý týdyrǵan bolatyn .
Beınetaspany YouTube-ke Rústem Rashev esimdi paıdalanýshy jarııalaǵan. «QazAqparat» tilshisi Rústem Rashev balabaqsha tárbıelenýshileriniń biriniń ákesi ekenin anyqtady.
Atalǵan oqıǵadan soń balabaqsha ákimshiligi tıisti qorytyndy shyǵaryp, balalardyń otyrýyna qolaıly oryndyqtar qoıǵan. Al edenniń nelikten qatty materıal - kafelden jasalǵanyn onyń jaryq sensorlarymen jabdyqtalǵanymen túsindirgen.
Qaraǵandy «Bilim bólimi» MM Jalpy jáne orta bilim sektorynyń meńgerýshisi Natalıa Golovına mektepke deıingi bilim mekemelerinde edendi kafelmen qaptaýǵa tyıym salynǵanyn aıtty.
«Álgi balabaqsha mektepke deıingi bilim salasynda qyzmet etý týraly habarlama almaǵan, ol jekemenshik. Sondyqtan da biz olarmen tikeleı jumys jasaı almaǵanbyz. Balabaqshalardyń barlyǵy belgilengen tártipte tirkelip, qyzmetin bastaý týraly habarlama alýy tıis», - dedi ol.
Sonymen qatar bilim bólimi ata-analardy áleýmettik jelige mundaı vıdeolardy jarııalamas buryn, resmı túrde tıisti organdarǵa habar berýge shaqyrady.