Qaraǵandydaǵy Avıatsııa murajaıynyń basshysy Jeńis Qasymbekten kómek surady

QARAǴANDY. QazAqparat – Qaraǵandydaǵy № 78 mektep ǵımaratynda ornalasqan Avıatsııa jáne kosmonavtıka murajaıynyń negizin qalaýshy Maǵrıfa Káribekova oblys ákimi Jeńis Qasymbekten kómek surady, dep habarlaıdy QazAqparat tilshisi.

Búgin Qaraǵandy oblysynyń basshysy Jeńis Qasymbek azamattardyń kezekti qabyldaýyn ótkizdi.

Aıta ketsek, aımaq ákimi «Nur Otan» partııasy fılıalynyń qoǵamdyq qabyldaýynda qaraǵandylyqtarmen aı saıyn kezdesedi.

Bul joly azamattar áleýmettik sıpattaǵy máselelerimen keldi. Máselen,

Avıatsııa jáne kosmonavtıka murajaıynyń negizin qalaýshy Maǵrıfa Káribekova ǵımaratty keńeıtý jáne jóndeý qajettiligi týraly áńgimeledi. Murajaı 10 jyldan astam ýaqyt boıy Qaraǵandy qalasyndaǵy № 78 mektep ǵımaratynda ornalasyp keledi. Barlyǵy synyp buryshynan jáne tuńǵysh ǵaryshker Toqtar Áýbákirovtiń sýreti bar birneshe fotosýretten bastalǵan. Jyldar ótken saıyn murajaı kollektsııasy keńeıip, búginde qorda myńnan astam jádiger bar. Olardyń arasynan sırek kezdesetin sýretterdi, ǵaryshkerlerdiń jeke zattaryn, naǵyz ǵarysh kemesiniń bólshegin kezdestirýge bolady.

Maǵrıfa Káribekova aıtýynsha, mektep murajaıyna jyl saıyn 1500-den astam adam keledi. Murajaı basqa mektep oqýshylary úshin de ashyq. Negizgi kelýshiler - balalar men jasóspirimder.

M. Káribekova murajaıǵa qoldaý kórsetýdi surady. Qazirgi ornalasqan orny tarshylyq etip, barlyq jádigerler syımaýda. Ony keńeıtý úshin bos alańdar bar, biraq jóndeý júrgizý qajet.

Jeńis Qasymbek jas urpaqty tárbıeleýge baǵyttalǵan osyndaı jobalardyń paıdasyn atap ótti. Oblys ákimi áleýmettik salaǵa jetekshilik etetin orynbasarlaryna atalmysh mektepke barýdy jáne jaǵdaıdy sol jerde zerdeleýdi tapsyrdy. Budan keıin jóndeý jumystaryn qarjylandyrý kózi anyqtalady.

Al Abaı qalasynyń turǵyny Alekseı Sım óz aqshasyna turǵyn úı mańyna salǵan balalar alańy týraly aıtyp berdi. Balalarǵa jasaǵan syılyǵyn zańdastyrý úshin jer ýchaskesine quqyqty resimdeý qajet. Ol bul alańdy qalaǵa tegin berýge daıyn ekenin aıtty.

Jeńis Qasymbek bul máseleni sheship, ońtaıly sheshim tabýdy tapsyrdy.

Budan bólek, oblys ákiminiń qabyldaýyna shyǵarmashylyq jastar mýzykalyq jobany qoldaý usynysymen júgindi. Sonymen qatar, múmkindigi shekteýli adamdardy qoldaý máseleleri talqylandy.