Qaraǵandydaǵy attraktsıon jelide kerneýdiń tómendeýinen turyp qalǵan
QARAǴANDY. QazAqparat – Qaraǵandy qalasynyń mádenıet jáne demalys saıabaqtary basqarmasy «Amerıkalyq taýlar» attraktsıonyndaǵy vagondardyń biri birneshe metr bıiktiktegi relste nelikten turyp qalǵanyn túsindirdi. Oqys oqıǵa osydan eki kún buryn bolǵan edi, dep habarlaıdy QazAqparat tilshisi.
«Jelidegi kerneýdiń tómendeýine baılanysty vagondy ózdiginen syrǵanaýdan qorǵaýdyń avtomatty júıesi iske qosylǵan, bul - qalypty jaǵdaı. Qyzmetkerler arnaıy satylarǵa kóterilip, júıeni mehanıkalyq túrde óshirdi jáne vagon avtomatty túrde iske qosylatyn jerge tústi. Vagonda 4 adam bolǵan, olar qandaıda bir narazylyq bildirmegen. Áleýmettik jelilerde jazylǵandaı, eshkim attraktsıon jolaýshylaryn baspaldaqtarmen nemese relstermen túsirgen joq»
, - dep túsindirdi Qaraǵandy qalasynyń mádenıet jáne demalys saıabaqtary basqarmasynan.
Osydan keıin Qaraǵandyǵa attraktsıonnyń tehnıkalyq jaǵdaıy týraly qorytyndy beretin táýelsiz saraptama komıssııasynyń qyzmetkerleri keldi.
«Qandaıda bir aqaýlar anyqtalǵan jaǵdaıda attraktsıondardyń kez kelgeni tolyq qalpyna keltirilip, qaıta saraptamadan ótkenge deıin jabylady. «Amerıkalyq taýlar» attraktsıonyndaǵy bul jaǵdaı shtattyq bolǵandyqtan, barlyq attraktsıondardy toqtatýdyń qajeti joq»
, - dep tolyqtyrdy mekemeden.
Basqarmadan málim etkenindeı, demalys maýsymynyń basynda barlyq attraktsıondar arnaıy fırmalardyń saraptamasynan ótedi. Nysandar jekemenshik ıeliginde bolǵandyqtan, tıisti kompanııalar attraktsıon operatorlary úshin nusqaýlyq pen jattyǵýlar da júrgizedi. Mamandandyrylǵan fırmalar attraktsıon operatorlaryna oqý sertıfıkattaryn beredi, sondaı-aq olardy parktiń tehnıkalyq qaýipsizdik qyzmeti tekseredi.
Bıylǵy maýsymnyń basynda barlyq saıabaqtardaǵy oıyn-saıyq nysandary oń saraptama nátıjelerin alǵan. Degenmen, osy oqıǵaǵa baılanysty kásipkerlerge qosymsha saraptama alý týraly uıǵarymdar berilmek.
Esterińizge sala keteıik, eki kún buryn «Amerıkalyq taýlar» attraktsıonynyń jolaýshylary bar shaǵyn vagony birneshe metr bıiktikte ornalasqan relste turyp qaldy. Qaza bolǵandar men zardap shekkender joq.
