Qaraǵandydaǵy apat: Zardap shekken 8 kenshiniń qal-ahýaly qalaı ekeni aıtyldy

ASTANA. QazAqparat – «Qazaqstan» shahtasynda shyqqan órtten japa shegip, aýrýhanaǵa jetkizilgen kenshilerdiń qazirgi densaýlyq jaǵdaıy belgili boldy, dep habarlaıdy QazAqparat tilshisi Qaraǵandy oblysy densaýlyq saqtaý basqarmasynyń baspasóz qyzmetine silteme jasap.

«Maqajanov atyndaǵy klınıkaǵa 8 shahter jetkizildi. Olardyń 2-eýi reanımatsııada jatyr, jaǵdaılary aýyrlaý, esterin biledi. Qalǵan 6 adam toksıkologııa bóliminde, olardyń densaýlyq jaǵdaılary ortasha aýyrlyq dárejede», - delingen basqarma taratqan habarlamada.

Qaraǵandydaǵy kómir shahtasynda zardap shekkenderdiń arasynda eki adam jansaqtaý bólimine jetkizilgeni týraly habarlaǵan edik.

Aıta keteıik, Prezıdent «Qazaqstan» shahtasynda bolǵan órt sebebin anyqtaý úshin jan-jaqty tergeý júrgizýdi tapsyrdy.

«Úkimetke osy kásiporynǵa ıelik etetin sheteldik kompanııamen jumysshylardyń qaýipsizdigin múltiksiz qamtamasyz etý jóninde kelissózder júrgizýdi tapsyryldy. Sheteldik kompanııaǵa tıesili kásiporyndarda jıi qaıtalanatyn apattar olardyń ınvestıtsııalyq jáne ózge de mindettemelerin óreskel buzǵanyn kórsetedi. Atalǵan jaǵdaılar olardyń Qazaqstan naryǵynda qyzmet etýine qatysty sheshim shyǵarýǵa yqpal etedi», - dep baıandalǵan Memleket basshysynyń tapsyrmasynda.