Qaraǵandydaǵy 16 qabatty úıde bolǵan jarylystan 3 adam qaza tapty

QARAǴANDY. QazAqparat - Qaraǵandyda turǵyn úıde bolǵan jarylystan úsh adam qaza tapty. Olardyń ekeýi er adam da, bireýi áıel, dep habarlaıdy QazAqparat.

Qaraǵandy qalalyq Tótenshe jaǵdaılar departamenti baspasóz qyzmetiniń habarlaýynsha, kezekshilik bólimine 10 qańtar kúni saǵat 21:29-da Respýblıka dańǵyly, 18/2 mekenjaıynda órt bolyp jatqany týraly habar túsken. 16 qabatty, 127-páterli turǵyn úıdiń 8-qabatynda jarylys bolyp, órt shyqqan. Oqıǵa ornyn tekserý barysynda úsh adamnyń denesi tabylǵan (boljam boıynsha eki er adam men áıel). TJD kúshteriniń kómegimen 11 adam qutqaryldy (onyń ishinde 2 bala). Oqıǵa ornyna TJD 88 qyzmetkeri jáne bólimsheleriniń 23 tehnıkasy jumyldyryldy.

Turǵyndardy jylytý úshin TJD 3 vahtalyq kóligi tartyldy.

Saǵat 22.55-de órt oqshaýlandy. Oblys ákimdigi evakýatsııalanǵan adamdardy qonaq úılerge jetkizýmen aınalysyp jatyr.

Osyǵan deıin Qaraǵandyda 16 qabatty úıde gaz jarylyp, turǵyndar evakýatsııalanyp jatqany týraly habarlandy.