Qaraǵandyda jylyna 30 mln oq-dári shyǵaratyn patron zaýyty ashylady

ASTANA. QazAqparat - Qazaqstan Qarýly Kúshteriniń 25 jyldyǵyna oraı, 2017 jyldyń jeltoqsan aıynda Qaraǵandyda alǵashqy qazaqstandyq patron zaýyty ashylady. Bul týraly búgin Ortalyq kommýnıkatsııalar qyzmetinde Qazaqstan Respýblıkasy Qarýly Kúshteriniń 25 jyldyǵyna arnalǵan baspasóz máslıhatynda QR Qorǵanys mınıstriniń orynbasary, general-maıor Talǵat Janjúmenov málim etti.

2016 jyldyń 14 naýryzynda Qaraǵandydaǵy «Saryrqa» arnaıy ekonomıkalyq aımaq aýmaǵynda alǵashqy qazaqstandyq patron zaýytynyń irgetasy qalanǵany habarlanǵan edi.  

Zaýyttyń jalpy aýdany 26 400 sharshy metrdi quraıdy. Josparǵa sáıkes, qurylys jumystary 2017 jyldyń jeltoqsan aıynda aıaqtalady. 

«Jeltoqsan aıynda ashylatyn jańa zaýyttyń jylyna otyz mıllıon oq-dári shyǵaratyn qaýqary bar. Kelesi jyldan bastap tórt tıp boıynsha shyǵarylǵan otandyq oq-dáriler Qazaqstannyń Qarýly Kúshterine jáne ózge de áskerı oryndarǵa jetkiziletin bolady», - dedi Talǵat Janjúmenov. 

Sonymen birge, Qorǵanys mınıstriniń orynbasary Qarýly Kúshteriniń 25 jyldyǵyna arnalǵan sharalardyń el aýmaǵynda jyl boıy jalǵasatynyn habarlady. Onyń aıtýynsha, 25 jyldyqqa oraı, bıyl jańa áskerı zamanaýı tehnıkalar alynyp, áskerı qyzmetshilerge baspana kilti tabystalady, jas órenderdi patrıottyq tárbıeleýge baǵyttalǵan túrli sporttyq-mádenı sharalar uıymdastyrylady.