Qaraǵandyda jylqydan ınfektsııa anyqtalǵan aýylda karantın engizildi

ASTANA. QazAqparat – Qaraǵandy oblysynyń Buqar jyraý aýdanyna qarasty Úmitker aýylynda jylqy maly arasynda tarǵan epızootıkalyq lımfangıt ınfektsııasyna baılanysty karantın engizildi, dep habaraıdy QazAqparat tilshisi.

«Qaraǵandy oblysy Buqar jyraý aýdany Úmitker aýyldyq okrýgi Úmitker aýyly aýmaǵynda jylqylar arasynda epızootıkalyq lımfangoıt aýrýynyń paıda bolýyna baılanysty karantın belgilensin. Aýdandyq veterınarııa bólimi janýarlardyń juqpaly aýrýynyń taralýyna jol bermeý maqsatynda, epızootııa oshaǵynda jáne qolaısyz pýnktterde veterınarııalyq-sanıtarııalyq qolaıly jaǵdaı jasap, qajetti veterınarııalyq-sanıtarııalyq is-sharalardy ótkizsin», - delingen «Ashyq» NQA portalynda jarııalanǵan aýyldyq okrýg ákiminiń sheshiminde.

Odan bólek, taıaýda Qostanaı oblysynyń Áýlıekól aýdanyna qarasty Dıev aýylynda iri qara maldan brýtsellez anyqtalyp, eldi meken aýmaǵynda shekteý sharalary engizilgen edi.