Qaraǵandyda jyl sońyna deıin 5 myńnan astam páter paıdalanýǵa beriledi
QARAǴANDY. QazAqparat – Qaraǵandyda jyl sońyna deıin 5 myńnan astam páter paıdalanýǵa beriledi. Bul týraly óziniń Facebook paraqshasynda Qaraǵandy oblysynyń ákimi Jeńis Qasymbek málim etti, dep habarlaıdy QazAqparat.
«Jaqynda ótken esep berý kezdesýi kezinde turǵyndar tarapynan turǵyn úı máselesi jıi kóterildi. Oblysta áleýmettik turǵyn úı kezeginde turǵan 36 myńnan astam azamat bar. Ókinishke qaraı turǵyn úı kezegine turǵan azamattar biraz ýaqyt tosýǵa májbúr. Olardyń kóbi óz páterlerin 10 jyldan astam ýaqyt kútedi. Osy máseleni nazarǵa ala otyryp, biz aldymyzǵa jyl saıyn qurylys qarqynyn arttyrý mindetin qoıdyq»,-jazady ákim.
Ol keltirgen derekterge qaraǵanda, ótken jyly óńirde qurylys jumystary qarqyndy júrdi. «Nurly jer» baǵdarlamasy boıynsha 21 mlrd teńge qarajat bólindi. Tek jergilikti bıýdjet qarajatynan ǵana jalǵa beriletin turǵyn úı qurylysyna 4,2 mlrd teńge jumsaldy. Osy arqyly qosymsha paıdalanýǵa shamamen 300 páter berildi.
Barlyǵy 530 myń sharshy metr turǵyn úı paıdalanýǵa berildi. Bul 2019 jylǵy kórsetkishten 26% - ǵa artyq. 6,5 myń otbasy ózderiniń turǵyn úı jaǵdaılaryn jaqsartty, onyń ishinde kezekte turǵan 2,5 myń azamat bar. Olardyń qatarynda 589 kópbalaly otbasy jáne 180 jetim bala bar.
Áleýmettik jalǵa beriletin jáne nesıelik turǵyn úı berý qarqyny bir jylda 40% - ǵa ósti.
«Qazir kóptegen adamdar jer úı salǵysy keledi. Bul úshin kommýnıkatsııa máselesin sheshý qajet. Osy maqsatta 2 myń jer ýchaskesin ınfraqurylymmen qamtamasyz etý úshin bıyl oblys úshin rekordtyq 5,8 mlrd teńge qarajat bólindi. Budan basqa, biz aýylda turǵyn úı salý kezindegi shyǵyndardyń bir bóligin sýbsıdııalaýdy josparlap otyrmyz»,-deıdi oblys ákimi.
Onyń aıtýynsha, óńirler boıynsha alǵanda, jyl sońyna qaraı 5000 – nan astam páter Qaraǵandyda, 300 páter Temirtaýda, 250 páter Jezqazǵanda, 59 páter Sátbaev qalasynda, 240 páter Saran qalasynda, 190 páter Buqar Jyraý aýdanynda, 140 páter Jańaarqa aýdanynda, 129 páter Balqashta, 39 páter Prıozerskide, 90 páter Nura aýdanynda, 68 páter Abaı aýdanynda, 74 páter Shahtınsk qalasynda, 57 páter Qarajalda, 56 páter Aqtoǵaı aýdanynda, 86 páter Qarqaraly aýdanynda, 75 páter Osakarov aýdanynda, 63 páter Ulytaý aýdanynda, 77 páter Shet aýdanynda paıdalanýǵa beriledi dep kútilip otyr.
«Jalpy alǵanda, 3 myńnan astam otbasyn, onyń ishinde 600 kópbalaly otbasyn jaldamaly jáne nesıelik turǵyn úımen qamtamasyz etý úshin qurylys kólemin 25% - ǵa arttyrýdy josparlap otyrmyz. Bul jyl sońyna qaraı 662 myń sharshy metrden astam baspana salynady degen sóz»,-dep qorytady sózin Jeńis Qasymbek.
