Qaraǵandyda jýrnalısterge oblys ákiminiń syılyǵy tabys etildi
QARAǴANDY. QazAqparat - Qaraǵandyda baılanys jáne aqparat qyzmetkerleriniń kúni qarsańynda oblys ákiminiń «Altyn Suńqar» syılyǵy tabys etildi. Bul týraly óńir basshysynyń baspasóz qyzmeti habarlandy.
«Óńirimizde jerlesteriniń joǵyn joqtaıtyn daryndy, joǵary bilikti jýrnalıster kóp. Mańyzdy jáne kúndelikti oqıǵalar týraly habar taratý arqyly olar adamdardyń ómirge belsendi aralasýyna, jańalyqtardan habardar bolýyna járdemdesedi», - dep jýrnalısterdi kásibı merekesimen aımaq basshysy Nurmuhambet Ábdibekov quttyqtady.
Bıyl baıqaý komıssııasynyń sheshimimen 10 jergilikti jáne respýblıkalyq BAQ qyzmetkeri túrli atalymdarda «Altyn suńqar» syılyǵyna ıe boldy.
«Kásibine degen adaldyǵy úshin» atalymynda BAQ ardageri, QR jýrnalıster odaǵynyń múshesi Aıqynbek Nesipbaı jeńiske jetti. Aýyl taqyrybynda habar taratqany úshin «Qarqaraly» aýdandyq gazeti redaktorynyń orynbasary Aıan Kızkın, óndiris taqyrybynda habar taratqany úshin temirtaýlyq jýrnalıst «Vechernıaıa gazeta» tilshisi Lıdııa Frolova syılyqqa ıe boldy. «Úzdik shyǵarmashylyq jumys» atalymynda «Novyı Vestnık» gazetiniń korrespondenti Anastasııa Mashnına syılyqqa laıyq dep tanyldy.
«Qaraǵandy jýrnalıstıkasynyń damýyna qosqan úlesi úshin» aqyn, jýrnalıst Serik Aqsuńqaruly oblys ákiminiń 1 mln teńge kólemindegi arnaıy syıaqysyna ıe boldy.
