Qaraǵandyda jumbaq jaǵdaıda kóz jumǵan sábı shujyqtan ýlanbaǵan
QARAǴANDY. QazAqparat -Qaraǵandydaǵy ınfektsııalyq aýrýhanada kóz jumǵan 3 jasar Aızere Qaharmanova jegen shujyqqa jáne balanyń nájisine jasalǵan zertteýdiń qorytyndysy shyqty, dep habarlaıdy «QazAqparat» HAA tilshisi.
Zertteýdi Ádilet mınıstrligine qarasty sot saraptamasy ortalyǵynyń mamandary júrgizgen.
Kóz jumǵan sábıdiń anasy Dıana Qaharmanova bul saraptama qorytyndysy túk te tań qaldyrmaǵanyn aıtady.
«Meni basshylyqa neshe kúnnen beri shyryldap aıtyp kele jatqanym osy bolatyn. Qyzyma bergen shujyq buzylmaǵan. Ony ózim de jedim jáne ýlanyp qalǵan joqpyn. Aızereniń jórgegindegi qaldyqtarǵa maǵan jáne shujyqqa tekseris jasaldy. Aızereden birdeńe tapqan sarapshylar menen jáne shujyqtan eshteńe tappady. Demek men ýlanǵan joqpyn. Olar báleniń basy etkisi kelgen shujyqtyń bul jerge esh qatysy joq. Demek, meniń qyzym ınfektsııany aýrýhanada juqtyrǵan», - deıdi Dıana Qaharmanova.
Osyǵan deıin oblystyń bas dárigeri Erjan Nurlybaev ta báleniń basyn shujyqpen baılanystyrmaý kerektigin aıtqan bolatyn.
«Shujyqpa álde basqa nárse me naqty baǵa berýge bolmaıdy»,-degen edi Erjan Nurlybaev.
Aızereniń anasyna saraptama qorytyndysy tanystyrylyp, tekseris materıaldary kórsetilgen. Tekserý jumystarymen Qaraǵandy oblystyq qoǵamdyq densaýlyqty saqtaý departamenti aınalysýda. Dıana komıısııa múshelerine senimsizdik tanytyp otyr.
«Departament basshysy jáne komıssııa tóraǵasy Olga Smırnova bizben tym qatań sóılesedi. Tipti daýysynda bizdiń ózimizdi aıyptaý belgisi baıqalady. Al ınfektsııalyq aýrýhananyń dárigerlerimen basqasha, olarmen sóıleskende jumsaryp qalady. Komıssııa tóraǵasy tekseris tarazysyn teń ustamaı qala ma degen qorqynysh bar»,-deıdi Aızereniń anasy.
Eske sala keteıik, 31 jeltoqsan kúni Qaraǵandydaǵy oblystyq ınfektsııalyq aýrýhanada 3 jasar sábı kóz jumǵan bolatyn.
Aızere Qaharmanovnyń ata-anasy qaıǵyly oqıǵaǵa dárigerlerdiń salǵyrttyǵy sebep boldy dep esepteıdi.
