Qaraǵandyda jóndelip jatqan joldardyń sapasyna nazar aýdarylady
ASTANA. QazAqparat - Qaraǵandy oblysynyń ákimi Erlan Qoshanov Oktıabr aýdanyn aralap shyqty. Aımaq basshysy jol jóndeý jumystarynyń sapasyn, áleýmettik nysandardyń jóndelý barysyn, aýlalardyń abattandyrylýyn óz kózimen qarap qaıtty, dep habarlaıdy ákimdiktiń resmı saıty.
Merdigerlermen áńgimelese kele oblys ákimi sapaǵa basa nazar aýdarýdy talap etti. Ony bıtým qaı jerde jáne qalaı tekseriletini qyzyqtyrdy. Sebebi sapasyz materıaldyń saldarynan kóktemde ótken jyly ǵana tóselgen asfalt «erip» ketken bolatyn.
«Talap qatań bolady. Alaqol merdigerlerdi «qara tizimge» engizetin bolamyz», - dep eskertti Erlan Qoshanov.
Qaraǵandyda bıylǵy jyly jol jóndeý jumystary 127 ýchaskide júrgizilip jatyr.
Salystyrar bolsaq, ótken jyly olardyń sany 27 bolatyn. Jalpy oblys boıynsha 860 shaqyrym joldy qalypqa keltirý josparlanyp otyr. Aýqymdy jumystar Qaraǵandy, Temirtaý, Balqash, Jezqazǵan jáne Sátpaev qalalarynda júrip jatyr. Eger ótken jyldary ortasha jóndeý jumystary úshin respýblıkalyq bıýdjetten shamamen 900 mln teńge bólingen bolsa, bıyl ol 5 mlrd teńgedeı bolyp otyr. Bul qarajatqa Qaraǵandy-Jezqazǵan, Qaraǵandy-Qarqaraly, Jezqazǵan-Qyzylorda joldary jódeledi. Barlyq joldar qyrkúıek aıyna deıin jóndelip bolýy tıis.
Erlan Qoshanov jumys sapary barysynda syn aıtyp, tapsyrmalar berdi. Qatań synǵa Qaraǵandy, Temirtaý, Jezqazǵandaǵy joldarda tapsyrystar alǵan «ArmStroı» kompanııasy alyndy.
«Biz búgin Oktıabr aýdanyn tekserip shyqtyq. Jumystar kestege saı júrgizilip jatyr. Sapaǵa basa nazar aýdarýdamyz. Ol úshin tehnıkalyq baqylaý men qoǵamdyq qadaǵalaý júrip jatyr. Saraptama úshin mamandandyrylǵan jáne táýelsiz zerthanalar jumyldyryldy. Olarda árbir asfalt toptamalary tekseriletin bolady», - dedi oblys ákimi jýrnalısterge bergen suhbaty barysynda.
