Qaraǵandyda jolaýshylar tasymalynyń kóleńkeli tustary barshylyq
ASTANA. QazAqparat - Kásipkerlik máseleleri boıynsha komıssııa otyrysynda jolaýshy tasymaldaý salasyndaǵy problemalar talqylandy.
Olardyń eń ózektilerin Qaraǵandy oblysynyń avtokóliktik kásiporyndar qaýymdastyǵynyń dırektory Aınetdın Býralkın ortaǵa saldy, dep habarlaıdy óńir ákimdiginiń resmı saıty .
- Birinshi problema - ol josyqsyz básekelestik jáne ashyq emes ekonomıka, dálirek aıtar bolsaq jolaýshylardyń zańsyz tasymaldanýy. Ekinshi problema - áleýmettik mańyzy bar qalalyq jolaýshy tasymaldaýlardyń shyǵyndary sýbsıdııalanbaıtyndyǵy. Osydan kelesi problema týyndaıdy - avtobýs parkteri jańartylmaıdy jáne júrgizýshiler jetispeıdi.
Aınıtdın Býralkınniń aıtýynsha, dál osy problemalardyń saldarynan jolaýshy tasymaldaý kólikteriniń kestesi buzylady. Jumys jasap júrgen avtobýstar tozady, al jolaýshy tasymaldaý salasynda jeke ınvestıtsııalar joq.
- Qaraǵandyda biryńǵaı ortalyqtandyrylǵan dıspetcher qyzmeti joq. Qalalyq avto kólikter avtobýs parkteri jáne tasymaldaýshy- jaldaýshylar arasynda bólinip alynǵan. Zańsyz jolaýshy tasymaldaýshylarmen kúreske jergilikti polıtsııa qyzmetin jáne Memlekettik kiris departamentin jumyldyrý kerek, - dep esepteıdi Aınetdın Býralkın.
Sonymen qatar kásipkerlik máselesi boıynsha komıssııa otyrysynda baǵdarlardyń shetki aıaldamalaryn jabdyqtaý, olardy avtobýs júrgizýshileri men kondýktorlar úshin yńǵaıly etý týraly da sóz qozǵaldy. Demalýǵa jáne tamaqtanýǵa arnalǵan arnaıy oryndar kez kelgen beketterde kezdese bermeıdi. Sanıtalyq-gıgıenalyq jaǵdaı jasalmaǵan.
- Ashyq emes ekonomıkamen kúres júrgizýde elektrondy bılet júıesin engizý eń tıimdi tásil bolady, - dedi otyrys barysynda Qaraǵandy qalasynyń ákimi Nurlan Áýbákirov. - Biz shyn mánisine keler bolsaq, aýdıtter rasynda júrgizile me joq pa, bile bermeımiz ǵoı. Iıa, jolaýshy tasymaldaýshylardyń esebinde málimetter keltirilgen. Biraq elektrondy júıeni engizgen soń naqty nátıjelerdi eseptep shyǵarý anaǵurlym ońaıyraq bolady dep oılaımyn. Biryńǵaı dıspetcherlik júıeni qurýǵa baılanysty jumystar atqaryp jatyrmyz. Al júrgizýshilerdiń demalý jáne eńbek etý sharttaryn jaqsartýǵa qatysty máselege toqtalar bolsaq, ol týraly orta jáne shaǵyn bıznes ókilderine shyǵý kerek.
Oblys ákimi Erlan Qoshanov barlyq shaǵymdar men usynystardy tyńdap bolǵan soń jergilikti polıtsııa qyzmeti men memlekettik kiris departamentine bet burdy.
- Biz jolaýshylar tasymaldaý máselesin birinshi ret talqylap otyrǵan joqpyz. Bul baǵytta jumystar atqaryp jatyrmyz. Qyzmet kórsetý jáne avtobýstar parkin jańartý máseleleri sheshilip jatyr. Eń ózekti problema - zańsyz jolaýshy tasymaldaýshylar bolyp tur. Ony retteý qajet. Men jergilikti polıtsııa qyzmetiniń bastyǵy Jalǵasbaı Jaqaev pen memlekettik kirister departamentiniń jetekshisi Azamat Ahmetovke olardy sheshý joldaryn anyqtaýdy tapsyramyn. Jáne de bul máseleni ózim qadaǵalaıtyn bolamyn, - dedi aımaq basshysy.
