Qaraǵandyda jolaýshylar avtobýsy men úsh jeńil kólik soqtyǵysty
QARAǴANDY. QazAqparat - Qaraǵandyda eki jol talǵamaıtyn kólik ózara soqtyǵysyp, saldarynan avtobýs pen taǵy bir kólikti qaǵyp ketken, dep habarlaıdy QazAqparat tilshisi.
25 aqpanda Qaraǵandy qalasynyń Kógildir toǵan shaǵynaýdanynda 39 jasar «Toyota Highlander» avtokóliginiń júrgizýshisi «Mitsubishi Pajero» kóligimen betpe-bet soqtyǵysqan. Aldyn ala boljam boıynsha, birinshi kóliktiń júrgizýshisi rýlge ıe bola almaı, joldyń qarsy jolaǵyna shyǵyp ketken. Saldarynan 4 kólik soqtyǵysqan, onyń ishinde bir avtobýs bar. Zardap shekken 3 adam oblystyq medıtsınalyq ortalyqqa jetkizildi.
Polıtsııa jol apatyna qatysty tergeý jumystaryn júrgizip jatyr.
