Qaraǵandyda jol belgilerine tekserý júrgiziledi
QARAǴANDY. QazAqparat - Qaraǵandyda jaıaý júrginshiler jolaǵynda balany qaǵyp ketýge jol belgisiniń kórinbeýi sebep bolýy oqıǵasynan keıin Qaraǵandy oblysynyń ákimi oblys ortalyǵyndaǵy barlyq belgilerge tekseris júrgizýdi tapsyrdy, dep habarlaıdy «QazAqparat» HAA tilshisi.
Polıtseıler Qaraǵandy ákimdiginiń abattandyrý bólimine birneshe ret hat jazyp, júrgizýshilerdiń belgilerdi kórýine kedergi keltiretin aǵashtardyń butaqtaryn kesýdi suraǵan. Biraq kommýnaldyq qyzmet bul ótinishke qulaq aspaǵan.
«Qaraǵandy ishki ister basqarmasy jol-tehnıkalyq ınspektsııa bólimi 2016 jyldyń aqpan aıynda ákimdikke ótinish jasaǵan. Biraq bizdiń ótinishimiz oryndalmady», - dep habarlady jol-tehnıkalyq ınspektsııa bóliminiń memlekettik ınspektory Oleg Konovalov.
Ákimdikte ótken jıynda óńir ákimi Erlan Qoshanov quzyretti organdarǵa júrgizýshiler men jolaýshylardyń barlyq jol belgilerin anyq kórýi úshin jaǵdaı jasaýyn tapsyrdy.
Eske salaıyq, 25 mamyr kúni 24 jastaǵy áıel Qaraǵandydaǵy Shtýrmanskıı kóshesindegi júrginshiler jolaǵynan ótip bara jatqan 9 jasar qyzdy qaǵyp ketken. Búldirshin qyz qaza boldy. Tergeý jumystary júrgizilip jatyr.
