Qaraǵandyda jol apatynan júrgizýshi men 10 jastaǵy bala mert boldy

QARAǴANDY. QazAqparat - Qaraǵandy oblysynyń Abaı qalasy mańynda mıkroavtobýs joldyń qarama-qarsy jolaǵyna shyǵyp ketip, jeńil kólikpen jáne júk kóligimen soqtyǵysty. Apat saldarynan Toıota markaly jeńil kóliktiń ishindegi júrgizýshi men 10 jasar bala kóz jumdy, dep habarlaıdy QazAqparat tilshisi.

Qaıǵyly oqıǵa búgin saǵat 15.00 shamasynda Abaı qalasynan 1 shaqyrym jerde boldy.

Polıtseılerdiń málimdeýinshe, 39 jastaǵy Mercedes-Benz Sprinte avtokóliginiń júrgizýshisi Qaraǵandy qalasynan shǵyp bara jatyp, aldyn ala boljam boıynsha joldyń qarsy baǵytyna shyǵyp, Toyota Avensis jáne Volvo júk kóligimen soqtyǵysqan.

«Jol-kólik oqıǵasynyń saldarynan Mercedes-Benz Sprinte avtokóliginiń júrgizýshisi jáne Toyota Avensis avtokóliginiń 10 jastaǵy jolaýshysy oqıǵa orynynda mert boldy. Mercedes-Benz Sprinte jáne Toyota Avensis avtokólikteriniń jolaýshylary aýrýhanaǵa jetkizildi», - dep habarlady Qaraǵandy oblysy Polıtsııa departamentiniń baspasóz qyzmeti.

Atalǵan fakti polıtsııada tirkelip, tıisti saraptamalar taǵaıyndaldy. Oqıǵa ornynda Qaraǵandy oblystyq Polıtsııa departamentiniń jedel-tergeý toby jumys istep jatyr. Jol-kólik oqıǵasy bolǵan joldyń bóligi ýaqytsha jabyldy.

Qaraǵandy oblystyq Polıtsııa departamenti kólik júrgizýshilerge jyldamdyqty shekten tys asyrmaı, jol-júrý erejelerin qatań saqtaýdy eskertedi.