Qaraǵandyda jol apatynan 3 adam zardap shekti
QARAǴANDY. QazAqparat - Maıqudyq kópirine barar jolda marshrýttyq avtobýs pen jeńil kólik soqtyǵysyp qaldy. Jol apaty saldarynan 3 zardap shekti, dep habarlaıdy QazAqparat tilshisi.
33 jastaǵy «Kıa» markaly jeńil kóliktiń júrgizýshisi rólge ıe bola almaı, joldyń qarsy jolaǵyna shyǵyp ketip, marshrýttyq avtobýspen soqtyǵysqan.
Jol apaty saldarynan eki júrgizýshi men bir jolaýshy túrli jaraqat alǵan. Oqıǵa ornynda bolǵan kýágerlerdiń aıtýynsha, avtobýsta bolǵan jolaýshy áıel aýyr jaralanǵan.
«Jol apaty saldarynan úsh adam zardap shekti. Bireýi - 1964 jyly týǵan áıel. Qarap shyqqan dárigerler áıeldiń keýde súıegi jaralanyp, ishi soǵylǵanyn jáne qabyrǵalary synǵanyn anyqtady. Al 1986 jyly týǵan er adam jabyq bas súıek-mı zaqymyn alǵan jáne tize býynyn jaraqattaǵan. Úshinshi zardap shegýshi - 1970 jyly týǵan er adam tós súıegin zaqymdap alǵan. Barlyǵy Maqajanov atyndaǵy klınıkaǵa jetkizildi. Áıeldi aýrýhanaǵa jatqyzdy», - dep málimdedi Qaraǵandy oblystyq densaýlyq saqtaý basqarmasynyń baspasóz qyzmeti.
Atalmysh derek boıynsha QR QK 610-baby 2-taraýyna sáıkes, «Kıa» kóliginiń júrgizýshisine qatysty ákimshilik óndiris bastalǵan.
