Qaraǵandyda joǵary tehnologııalyq qurylǵylarmen jabdyqtalǵan jańa balalar aýrýhanasy ashyldy

QARAǴANDY. QazAqparat – Qaraǵandyda kópsalaly oblystyq balalar klınıkalyq aýrýhanasy ashyldy. Ol 200 orynǵa arnalǵan. Aýrýhanada 450 dáriger jumys isteıtin bolady. Ǵımaratta júre almaıtyn naýqastardy tasymaldaýǵa arnalǵan lıftiler bar, dep habarlaıdy QazAqparat tilshisi.

«Jańa aýrýhanada sábılerge de, eresek balalarǵa da sapaly kómek kórsetý úshin barlyq jaǵdaı jasalǵan. Bul nysannyń qurylysy birqatar sebepterge baılanysty sozylyp ketti. Atap aıtqanda, biz zamanaýı joǵary tehnologııalyq jabdyqty jetkizýdi kópten kúttik. Mysaly, Japonııadan kúıikke qarsy jeti tósekke tapsyrys berildi», - dedi Qaraǵandy oblysynyń ákimi Ermaǵanbet Bólekpaev.

Innovatsııalyq kúıikke qarsy kereýetter naýqastarǵa óte yńǵaıly. Tósek toltyrǵyshynyń tyǵyzdyǵyn sýdyń tyǵyzdyǵymen salystyrýǵa bolady, sondyqtan qatty kúıik shalǵan naýqas qalqyp jatqandaı bolady. Bul zaqymdalǵan terige qysym jasamaýǵa kómektesedi. Mıkrosferalar arqyly ótetin aýa avtomatty túrde qajetti temperatýraǵa deıin qyzady jáne bakterııalardyń kóbeıýine jol bermeı, teriniń kebýine áser etedi.

Aýrýhanada konsýltatıvtik ortalyq jumys isteıdi. Onda travmatologııa jáne ortopedııa, neırohırýrgııa, jaq-bet bólimsheleri bolady.

«Buryn osy beıinder boıynsha patsıentterdi emdeý úshin biz ana men bala ortalyǵyna, travmatologııa jáne ortopedııa ınstıtýtyna, Maqajanov atyndaǵy klınıkaǵa nemese Astananyń neırohırýrgııa ǵylymı ortalyǵyna joldadyq. Endi biz ózimizde emdeı alamyz. Bizdiń jabdyqtar joǵary tehnologııalyq, operatsııalyq bólmeler avtonomdy jeldetýmen jabdyqtalǵan, olarda HEPA súzgileri ornatylǵan. Munda eń kúrdeli operatsııalardy jasaýǵa bolady. Jaqyn arada bizdiń neırohırýrgter Germanııa men Izraılde oqýdan ótedi», - deıdi Qaraǵandy oblysy Densaýlyq saqtaý basqarmasynyń basshysy Bıbigúl Tólegenova.

Medıtsınalyq mekeme bazasynda emdik dene shynyqtyrý zamanaýı kabınetteri, tuz, sensorlyq jáne shýngıtti bólmeler bar.

Sondaı-aq, «QAMQORLYQ» erte damý ortalyǵy jumys isteıtin bolady, onda úsh aıdan bastap úsh jasqa deıingi balalar keshendi ońaltý kómegin ala alady. Ortalyq aı saıyn ártúrli nevrologııalyq dıagnozdary bar 50-ge deıin balany qabyldaýdy josparlap otyr. Ońaltý kýrsynyń uzaqtyǵy 21 kúndi quraıdy.

Osy ýaqytqa deıin balalar aýrýhanasy bolǵan ǵımarat medıtsına qyzmetkerlerine arnalǵan kópqabatty turǵyn úı retinde qaıta qurylady. Jas mamandarǵa arnalǵan 94 páter qurý josparlanyp otyr.

Jańa kópsalaly oblystyq balalar klınıkalyq aýrýhanasy Kenshiler dańǵyly, 81/1 mekenjaıy boıynsha ornalasqan.