Qaraǵandyda jerasty ótkelderi bazarǵa aınaldy
QARAǴANDY. QazAqparat - Qaraǵandydaǵy úsh jerasty ótkeli sanıtarlyq normalar men erejelerge saı emes bazarlarǵa aınaldy, dep habarlaıdy «QazAqparat» HAA tilshisi.
Qala turǵyndary úsh jerasty ótpe joldaryn aralap shyqqan Qaraǵandy qoǵamdyq keńesine birneshe ret shaǵymdandy.
Jerasty ótkelderiniń biri jeke kásipkerge jalǵa berilgen, onyń bul jerdi bazarǵa aınaldyryp, jumys kestesin ornatyp qoıǵandyǵy anyqtaldy. Túngi ýaqyttarda jerasty ótkeli qala turǵyndary úshin jabyq turady. Kásipker jerasty ótkeliniń negizgi maqsaty - jaıaý júrginshilerdiń qaýipsizdigin qamtamasyz etý ekendigin esepke almaǵan.
«Qaraǵandylyqtar menshik ıesiniń Núrken Ábdirov kóshesindegi jerasty ótkelin túngi ýaqyttarda jaýyp tastaýyna baılanysty narazylyqtaryn bildirýde. Sonyń saldarynan qaýipsiz ári jol júrý erejesin buzbaı kósheden ótý múmkin bolmaı otyr», - dedi Qaraǵandy qoǵamdyq keńesiniń múshesi Qabdyǵalı Ospanov.
Qabdyǵalı Ospanovtyń málimdeýinshe, bul jerlerde azyq-túlik ónimderi daıyndalyp, satylady jáne onda sanıtarlyq normalardy buzýshylyq anyqtalǵan. Samsa jáne bálishter sý qubyry joq jerasty ótkelinde daıyndalady. Barlyq qujattar menshik ıesinde ekendigin málimdegen satýshylar qoǵamdyq keńes múshelerine sanıtarlyq kitapshalaryn da kórsetpegen.
«Qoldaryńyzdy, shıki et salynǵan ydystaryńyzdy qaıda jýasyzdar degen suraǵyma - bótelkemen ákelingen sýǵa jýamyz dep jaýap berdi. Mynandaı jaǵdaıda ázirlenetin taǵamdardy qala turǵyndarynyń satyp alyp jeýin elestetýdiń ózi qorqynyshty», - deıdi Qabdyǵalı Ospanov.
Tekserý nátıjesi boıynsha keńes músheleri barlyq úsh jerasty ótkeline qatysty ákimdikke uzaq merzimdi jalǵa berýdi toqtatyp, óz maqsatynda paıdalanýǵa berilýi talap etilgen hat daıyndaýda.
