Qaraǵandyda jer satyp alý rásimin jeńildetetin karta ázirlendi

QARAǴANDY. QazAqparat - Qaraǵandyda ınjenerlik jelilerge qosylýdy jeńildetetin karta jasaldy. Bul kommýnıkatsııalarǵa qosylýǵa ruqsat berý qujattaryn alý kezinde jemqorlyq faktilerin qysqartýǵa kómektesedi, dep habarlaıdy QazAqparat tilshisi.

Qaraǵandy oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń qyzmetkerleri kommýnaldyq kásiporyndardaǵy sybaılas jemqorlyq táýekelderine taldaý júrgizdi. Olardy baǵalaý nátıjesi boıynsha, tutynýshylarda eń kóp qıyndyqtar ınjenerlik jelilerge qosylýǵa tehnıkalyq sharttardy alý kezinde týyndaıtyny anyqtaldy.

«Biz 2019 jylǵy qańtar-qarasha aralyǵynda «Teplotranzıt-Karaganda» JShS 415 tehnıkalyq shart bergenin anyqtadyq. Onyń ishinde 108-ne teris jaýap kelgen. Bizdiń oıymyzsha, sebepter keı kezde negizsiz bolǵan. Osyndaı ádiletsizdik pen sybaılas jemqorlyq táýekelderin boldyrmaý úshin biz jergilikti atqarýshy organdarmen birlesip qazir is-qımyl josparyn ázirlep jatyrmyz», - dedi Qaraǵandy oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamenti basshysynyń orynbasary Berik Ahmetov.

Josparǵa ınjenerlik jelilerge qosylýdyń elektrondyq kartasyn jasaý kiredi. Ol qandaı aýdandarda mundaı múmkindik bar ekenin, al qandaı aýdandarda joq ekenin kórýge múmkindik beredi. Karta qurylys úshin jer satyp alǵysy keletinderge paıdaly bolady.

Sondaı-aq, departament pen qala ákimdiginiń qyzmetkerleri kommýnaldyq kásiporyndardyń jumysyn bir tereze qaǵıdaty boıynsha qaıta qurý jóninde kelissózder júrgizýde. Bul óz kezeginde qujat berý protsesin jedeldetýge, sonyń saldarynan sybaılas jemqorlyq táýekelderin qysqartýǵa kómektesedi.

Іs-sharalardyń tolyq jospary jaqyn arada ázirlenedi. Ony osy jyldyń jazynyń sońyna deıin júzege asyrý josparlanyp otyr.