Qaraǵandyda jeńil kólik qalaaralyq avtobýspen soqtyǵysyp qaldy
QARAǴANDY. QazAqparat - Qaraǵandy qalasynda jeńil avtokólik 30-dan astam jolaýshysy bar qoǵamdyq avtobýspen soqtyǵysty, dep habarlaıdy QazAqparat tilshisi.
Búgin, 5 maýsymda Qaraǵandy qalasynyń Oktıabr aýdanyndaǵy 15-shi Magıstral jolynda «Aýdı 80» avtokóliginiń júrgizýshisi Popov kóshesine qaraı baǵyt alyp bara jatyp, aldyn ala boljam boıynsha joldyń qarsy betine shyǵyp ketip, «Qaraǵandy-Temirtaý» baǵytyndaǵy jolaýshylar avtobýsymen soqtyǵysqan.
Jol apaty saldarynan «Aýdı 80» avtokóliginiń júrgizýshisi jáne onyń jolaýshysy, sondaı-aq avtobýstyń bir jolaýshysy ártúrli dene jaraqattarymen aýrýhanaǵa jetkizildi.
Jol kólik oqıǵasy kezinde avtobýsta 31 jolaýshy bolǵan.
Qazirgi ýaqytta tıisti saraptamalar taǵaıyndalyp, tergeý amaldary júrgizilýde.
