Qaraǵandyda jedel járdem stansasyn durys salmaǵan merdiger sotta jaýap beredi
QARAǴANDY. QazAqparat - Qaraǵandyda jańadan salynyp jatqan jedel járdem qosalqy stansasynyń qurylysyna qatysty shý shyqty. Merdigerler anyqtalǵan aqaýlardy jóndeýden bas tartqandyqtan, oblystyq qurylys, sáýlet jáne qala qurylysy basqarmasy kompanııany sotqa berdi, dep habarlaıdy QazAqparat tilshisi.
Maıqudyq shaǵyn aýdanynda jańa jedel medıtsınalyq járdem qosalqy stantsııasy salyna bastaldy. Alaıda, merdigerlerdiń jumysynan kemshilikter tabylǵan. Endigi kezekte tapsyrys berýshi sot arqyly atalmysh olqylyqtardy joıýdy talap etip otyr.
«TehStroıSnab LTD» JShS jylyna 25-50 myń shaqyrtýǵa shyǵa alatyn jedel járdem qosalqy stantsııasynyń qurylysyn konkýrsta jeńip aldy. Bastapqyda merdiger bólingen somadan 33% kóleminde úlken jeńildik bergen bolatyn. Kompanııa 353 mln teńgege nysan salýdy qolǵa aldy. Nátıjesinde únemdeý saldary sapaǵa áserin tıgizdi. Qurylys 2018 jyldyń shilde aıynda bastaldy. Jumys barysynda tehnıkalyq tekserý qorytyndysy boıynsha aqaýlar anyqtaldy», - dedi Qaraǵandy oblysynyń qurylys, sáýlet jáne qala qurylysy basqarmasy basshysynyń orynbasary Nııazbek Beısembaev.
Tekseris nátıjesinde ákimshilik-turmystyq keshenniń ǵımaraty nóldik belgiden 30 sm tómen otyrǵyzylǵany belgili bolǵan. Sonymen qatar, qabataralyq jabyndardyń kirpishteri men plıtalary ǵımarattyń irgetasyna qaraı jyljı otyryp, kólbeý tóselgen. ÁTK jáne garaj ǵımarattarynyń osterin bólý jobadan aýytqyp oryndalǵan.
Osynyń barlyǵy qurylys sapasyna keri áserin tıigizgen. Eń bastysy – qurylysqa eshqandaı kepildik pen senimdilik joq.
Dál osy merdiger kompanııa osyǵan deıin Qaraǵandy qalasynyń Maıqudyq shaǵyn aýdanyndaǵy Mádenıet úıine kúrdeli jóndeý jumystaryn júrgizgende de olqylyqtar jibergen. Bul nysanǵa qatysty 2019 jyly sot úkimi shyǵyp, atalmysh qurylysshylar memlekettik satyp alýǵa qatysatyn alaqoldar tizimine engen.
Endi olar kezekti qurylys nysany boıynsha taǵy da sot qaraýyna túsedi. Merdiger kompanııa óz erkimen atalǵan aqaýlardy jóndeýden bas tartyp otyr.
«Qabyldanǵan sharttyq mindettemelerge teris pıǵylmen qarap, qurylys merzimderin saqtamaı, qurylys normalary men erejeleriniń talaptaryn oryndamaı, sondaı-aq qurylys-montaj jumystaryn sapasyz oryndaýyna baılanysty sotqa talap aryz berildi. Biz eskertýlerdi joıyp, nysandy jobaǵa saı keltirýdi talap etemiz. Sot otyrysy 6 tamyzǵa belgilendi. Buǵan qosa, oryn alyp otyrǵan jaıttarǵa baılanysty merdigerler óz kezeginde jaýapkershilikten jaltaryp, jobany túzetýdi talap etpekshi», - dedi Nııazbek Beısembaev.
