Qaraǵandyda jedel járdem dárigeri mektepke «mına» qoıǵan
QARAǴANDY. QazAqparat - Qaraǵandyda jeke kásipkerdiń páterine qalanyń 22 shaǵynaýdanyndaǵy mekteptegi terakti jaıly qońyraý shalǵan áıel oblystyq jedel járdem stansasynyń dárigeri bolyp shyqty, dep habarlaıdy «QazAqparat» HAA tilshisi.
«Jedel járdem stansasy» memlekettiń kommýnaldyq kásipornynda on jylǵa jýyq eńbek etetin tájirıbeli mamannyń bul teris qylyǵy áriptesteri arasynda túsinbeýshilik týǵyzdy.
«Dáriger 60 jasta. Medıtsına salasynda tájirıbesi mol. Ol telefon nómirinen qatelesken. Sot-medıtsınalyq saraptama bıýrosyna qońyraý shalýdyń ornyna kásipkerge habarlasqan»,-dep málim etti «Jedel járdem stanasasy» kásipornynan.
Qaraǵandy oblystyq ІІD baspasóz qyzmetiniń jetekshisi Baqytjan Kudııarovtyń túsindirýinshe, Qaraǵandydaǵy 22 shaǵynaýdandaǵy mekteptegi terakti jónindegi habar polıtsııaǵa 10.18-de túsken.
«202 nómirine er adam qońyraý shalǵan. Ol úıine statsıonarlyq telefonnan belgisiz áıel mektep ǵımaratyna jarylǵysh qurylǵy qoıylǵandyǵyn aıtqan. Oqıǵa ornyna barlyq shuǵyl qyzmet attandy. Ǵımarattan 900 adam evakýatsııalandy. Jarylǵysh qurylǵy tabylǵan joq»,-dep habarlady Baqytjan Qudııarov.
Onyń aıtýynsha, qazirgi ýaqytta sot aldy tergeý júrgizilýde.
