Qaraǵandyda jedel medıtsınalyq járdem kórsetetin qosalqy stantsııa ashyldy
QARAǴANDY. QazAqparat – Qaraǵandyda jedel medıtsınalyq járdem kórsetetin qosalqystantsııasynyń qurylysy aıaqtaldy. Ol Maıqudyq turǵyndaryna qyzmet kórsetedi, dep habarlaıdy QazAqparat tilshisi.
Jańa qosalqy stantsııanyń aýdany 1 300 sharshy metrden asady. Negizgi ǵımaratta dıspetcherlik bólme, qyzmetkerlerdiń demalys bólmeleri ornalasqan, sondaı-aq jedel járdem mashınalaryn jóndeýge arnalǵan angar men garajdar bar.
Jańa ǵımaratta 146 adam, 11 brıgada jumys isteıdi. Olar jylyna 25-ten 50 myńǵa deıin qońyraý qabyldaı alady.
«Búgin bizde qýanyshty oqıǵa – biz jańa qosalqy stantsııa ǵımaratyna kóshýdemiz.
Buǵan deıin ol Gvardeıskaıa kóshesindegi eski ǵımaratta bolǵan. Qosalqy stantsııa tıptik, barlyq standarttarǵa sáıkes keledi. Qyzmetkerler úshin barlyq jaǵdaı jasalǵan: jaıly demalys bólmeleri, avtojýý, jóndeý tsehtary, usaq jóndeýge arnalǵan jabdyqtar. Sondaı-aq, oblys ákimdigi bizdiń qosalqy stantsııaǵa patsıentterdi tasymaldaý úshin tórt avtomobıl syıǵa tartty», – deıdi oblystyq jedel medıtsınalyq járdem stantsııasynyń dırektory Zýlfıkar Ábilqasymov.
Aıta ketý kerek, qazirgi ýaqytta bolashaqta Prıshahtınsk jáne Suryptaý turǵyndaryna qyzmet kórsetetin taǵy bir qosalqy stantsııanyń qurylys jumystary aıaqtalýǵa taıaý.
