Qaraǵandyda jazǵy lagerler bıyl 190 myńnan astam oqýshyny qabyldaıdy

QARAǴANDY. QazAqparat – Qaraǵandy oblysynda qolaıly sanıtarııalyq-epıdemıologııalyq jaǵdaıda kanıkýl ýaqytynda qala syrtyndaǵy 11 jáne 102 shatyrly jáne kıiz úı balalar lageri jumys isteıdi. Ruqsat etilgen jaǵdaıda lagerler 190 myńnan astam oqýshyny qabyldaýǵa ázir. Onyń kópshiligi áleýmettik az qamtylǵandar sanatynan, dep habarlaıdy QazAqparat tilshisi.

Óńirlik kommýnıkatsııalar qyzmetinde ótken brıfıngte bilim basqarmasynyń basshysy Gúlsim Qojahmetova jazǵy ýaqytta oqýshylardyń paıdaly jáne qaýipsiz bos ýaqytyn uıymdastyrý týraly aıtyp berdi.

Ol shomylý maýsymy kezinde balalardyń qaýipsizdigin qamtamasyz etý úshin bilim basqarmasy «Qaýipsiz jaz» aktsııasyn, «Jas qutqarýshy» oblystyq jáne óńirlik jarysyn ótkizetinin atap ótti.

«Balalar men pedagogtar sýǵa batqan kezde alǵashqy medıtsınalyq kómek kórsetýdi úırenedi, jadynamalar men býkletter taratýǵa bastamashylyq jasaıdy. Mektep basshylyǵy oqýshylardy júzýge úıretý boıynsha basseındermen memorandýmdarǵa qol qoıady. Sonymen qatar, jergilikti atqarýshy organdar qańqaly basseınderdi satyp alý boıynsha jumys júrgizýde», – dep atap ótti Gúlsim Qojahmetova.

Sondaı-aq, jazǵy kezeńde «Qaýipsiz attraktsıon», «Qaýipsiz lager», «Qaýipsiz alań» aktsııalary josparlanǵan.

Ata-analarǵa ashyq otty, elektr quraldaryn, gaz jabdyqtaryn paıdalaný erejesi, sondaı-aq sýda júzý jáne jolda júrý erejesi týraly balalarmen áńgimelesý usynylady.

Balalarǵa shuǵyl qyzmetterdiń 112, 101, 102, 103 nómirlerin úıretý kerek, dep atap ótti spıker.

Qaraǵandy oblysy TJD qutqarý bólimsheleri de joǵary daıyndyq rejımine kóshirildi. Olar sý aıdynynda reıd júrgizedi, demalýshylarǵa jadynama taratady.

Sonymen qatar, qutqarýshylar jabdyqtalmaǵan sý aıdyndaryna 174 tyıym salý belgisin ornatty.

«Bizdiń bastamamyz boıynsha 2GIS júıesinde shomylýǵa bolatyn sý aıdyndary men demalys aımaqtary arnaıy belgimen belgilendi», – dep habarlady brıfıng barysynda Qaraǵandy oblysy TJD basshysynyń m. a. Aqylbek Ahmetjanov.

Sondaı-aq TJD qyzmetkerleri júzden astam qoǵamdyq qutqarýshylardy oqytyp, jumystaryn uıymdastyrdy.

Olar oblystyń sý aıdyndarynda aldyn alý jumysyna tartylady.

«Fedorov, Samarqand, Sherýbaı-Nura, Keńgir sý qoımalarynyń jaǵalaýlarynda, sondaı-aq Balqash jáne Aınakól kólderinde táýlik boıy jeti qutqarý bólimshesi qyzmet atqarady. Olar qajetti avtokólik tehnıkasymen jáne júzý quraldarymen jabdyqtalǵan», – dedi Aqylbek Ahmetjanov.