Qaraǵandyda «Jaz energııasy» segizinshi graffıtı baıqaýy ótedi
QARAǴANDY. QazAqparat - Jyl saıyn ótetin «Jaz energııasy» graffıtı baıqaýyna qatysýǵa ótinishtar qabyldaý bastaldy. Bıylǵy jyly Qaraǵandyda bul baıqaý segizinshi ret ótedi. Jeńimpaz syılyq retinde 150 myń teńge alady, dep habarlaıdy QazAqparat Qaraǵandy oblysy ákimdiginiń baspasóz qyzmetine silteme jasap.
«Jaz energııasy» baıqaýyn Qaraǵandy Jaryq kompanııasy ótkizedi. Qatysýshylarǵa qaladaǵy transformatorlyq beketterge sýret salýǵa múmkindik beriledi. Sýretshiler baıqaýda usynylǵan birneshe taqyryptyń ishinen ózine unaǵanyn tańdaı alady: «Elektr qýaty qaýipti!», «Qııal-ǵajaıyp álemi - men stıl syılaımyn», «Fýtbol boıynsha Álem chempıonaty», «Astana - arman qala» jáne «Qaraǵandy Jaryq - 15 jyl birge».
Uıymdastyrýshylar qatysýshylarǵa kelip-qaıtý jolaqysy men jatatyn orynnyń tólemin ótep, aerozoldik baıaýlardy beredi. Baıqaýdyń bas júldesi - 150 myń teńge. Aqshalaı syılyqty sonymen qatar 1,2 jáne 3 oryn ıelengender alady - 100 myń, 70 myń jáne 50 myń teńge. Buǵan qosa, «Qaraǵandy Jaryq» kompanııasynyń dırektory atynan syılyq taǵaıyndalǵan - 150 myń teńge.
Baıqaýǵa qatysý úshin uıymdastyrý komıtetine aldyn ala jumys eskızin jiberip jáne graffiti.k-zharyk.kz mekenjaıynda ótinish toltyrý qajet. Eskızder 31-shi shildege deıin qabyldanady.
«Jaz energııasy» jas graffıtı-sýretshilerdiń baıqaýy alǵash ret Qaraǵandyda 2011-shi jyly ótken. Jyl saıyn ol Qazaqstan men Reseıdiń túrli qalalarynan komandalardyń basyn qosady. Baıqaýdyń tarıhynda sýretter qalamyzdyń 250 transformatorlyq beketterinde salyndy.
2017-shi jyly «Jaz energııasy» baıqaýyna Qaraǵandy, Almaty, Astana, Pavlodar, Sankt-Peterbýrg jáne Ekaterınbýrgten 34 qatysýshy kelip baq talastyrdy.
Graffıtı - búgingi tańda qazirgi zamanǵy derbes janr, mádenıet pen qalalyq ómirdiń ajyramas bóligi. Kóptegen elder men qalalarda óz shaharlarynda naǵyz óner týyndylaryn jasaıtyn tanymal sýretshileri bar. Keıbir adamdar úshin graffıtı - galereıalar men kórmelerge qoıýǵa laıyqty naǵyz óner, al keı adamdar úshin - ol vandalızm.
«Jaz energııasy» uıymdastyrýshylary baıqaý jas sýretshilerge zańdy túrde graffıtımen aınalysýǵa múmkindik beretinin atap aıtty.
