Qaraǵandyda jastarǵa arnalǵan turǵyn úı baǵdarlamasymen ótinish qabyldanyp jatyr
Jańa joba jas muǵalimderge, dárigerlerge, meıirbıkelerge, mádenıet qyzmetkerlerine, sportshylarǵa, jattyqtyrýshylarǵa, jýrnalısterge, ýnıversıtet oqytýshylaryna, ǵylymı, áleýmettik jáne kommýnaldyq mekeme qyzmetkerlerine jeke baspana alý úshin jeńildetilgen zaem alýǵa múmkindik beredi.
Baǵdarlama boıynsha úmitker jasy 35-ten aspaýy kerek. Baǵdarlamaǵa qatysýshylardyń tańdaǵan saladaǵy resmı jumys ótili, ótinish bergen kezde, sońǵy bir jyldan kem bolmaýy tıis. Sondaı-aq, baǵdarlamaǵa qatysýshy men onyń otbasy músheleriniń sońǵy 5 jyl ishinde jyljymaıtyn múlki bolmaýy shart.
«Ekinshi jyl qatarynan Qaraǵandy oblysynyń ákimdigi «Otbasy bankimen» birge jastarǵa arnalǵan jeke turǵyn úı baǵdarlamasyn iske asyryp keledi. Oblys ákimdigi osylaısha jas mamandarǵa qoldaý kórsetýdi jón kórgen. Byltyr jobany júzege asyrýǵa jergilikti ákimdik 1 mlrd teńge, al «Otbasy bank» 500 mln teńge bólgen bolatyn. Atalmysh baǵdarlama kómegimen 100-ge jýyq adam baspanaly boldy. Bıyl da qarjylandyrý sol tártippen júzege asady, jańa qonys ıelerin asyǵa kútemiz», - deıdi «Otbasy bank» AQ Qaraǵandy oblystyq fılıalynyń dırektory Baýyrjan Jýaspaı.
Jańa turǵyn úı baǵdarlamasyna qatysý týraly ótinishter mamyr aıynyń 2-12 aralyǵynda jalǵasady. Úmitkerler qalalyq ákimdikke barýlary qajet. Jumys ýaqyty 9:00-den 18:00-ge deıin, túski asqa úzilis 13:00-den 14:30-ǵa deıin.
Ótinishterdi qabyldaý aıaqtalǵannan keıin, memlekettik jáne qoǵamdyq ókilder men depýtattardan quralǵan komıssııa músheleri qatysýshylardy iriktep, tizimdi «Otbasy bankine» joldaıdy. Bankte úmitker tólem qabilettiligin tekserip, naryqtan páter tabýy qajet. Baspanany Qaraǵandy qalasynda ornalasqan birinshi nemese ekinshi naryqtaǵy nysandardan tańdap alýǵa bolady.
Turǵyn úı satyp alýǵa «Otbasy bank» 20 mln teńgege deıin zaem beredi (eger múliktiń quny 20 mln teńgeden asatyn bolsa, satyp alýshy aıyrmashylyqty óz qarajaty esebinen tóleı alady). Bastapqy jarna – 10%, nesıe boıynsha syıaqy mólsherlemesi – jyldyq 5% (JTSM 5,2%), nesıeniń tólem merzimi – 19 jylǵa deıin.
