Qaraǵandyda «Jastar» ıpotekasynyń alǵashqy úmitkerlerine sertıfıkat tabys etildi
Qaraǵandy oblysynda «jastar» ıpotekasy iske qosyldy. Oblys ákimdigi jáne «Otbasy Banki» bastamasymen qolǵa alynǵan jańa baǵdarlama muǵalimderge, dárigerlerge, jýrnalısterge, mádenıet jáne sport, áleýmettik sala qyzmetkerlerine, JOO oqytýshylary men ǵylymı qyzmetkerlerge qoljetimdi. Tıimdi nesıeni alǵashqy bolyp 75 jas maman ıelendi.
«Ótken jyly biz jastarǵa jeńildetilgen ıpoteka berý týraly sheshim qabyldadyq. Ol oblys ortalyǵynda pılottyq rejımde iske qosyldy. Oblystyq bıýdjetten 1 mlrd teńge, «Otbasy banki» qosymsha 500 mln teńge bóldi. Kelesi jyly bul baǵdarlamaǵa bólinetin qarjy kólemin ulǵaıtyp, basqa qalalarǵa da shyǵýdy josparlap otyrmyz», – dedi oblys basshysy Jastar isi jónindegi keńes otyrysynda sertıfıkattardy tapsyrý kezinde.
Qaryz jylyna 5%-ǵa, al merzimi – 19 jylǵa deıin bolady. Bastapqy jarna – jalpy somanyń 10%-y. Turǵyn úıdi jańa ǵımarattan nemese ekinshi naryqta tańdaýǵa bolady. Ótinimderdi arnaıy komıssııa qarady.
Oblystyq klınıkalyq aýrýhananyń medbıkesi Nazgúl Ahmetjanovanyń aıtýynsha, ol on jyldan astam ýaqyt páter kezeginde turǵan.
«Bizdiń otbasymyzda kishkentaı bala bar, ol eki jasta. Biz ata-analarymyzben birge turamyz. Qazirdiń ózinde Ońtústik-Shyǵysta páter taýyp, rásimdeýdi bastadyq. Árıne, óte qýanyshtymyn. Jastarǵa arnalǵan osyndaı baǵdarlamalar kóbirek bolsa, bul jaqsy qoldaý», - deıdi sertıfıkat ıesi.
Vladıslav Frızen oblystyq mamandandyrylǵan olımpıadalyq rezervtegi balalar mektebinde jeńil atletıkadan jattyqtyrýshy bolyp jumys isteıdi. Jaqynda úılenip, jubaıymen jaldamaly páterde turady.
«Men bul baǵdarlama týraly bilgende, baǵymdy synap kórýdi sheshtim. Men qujattardy tapsyrdym, bári oıdaǵydaı boldy. Qazir páter izdeımiz. Baspanaly bolý jas otbasy úshin eń mańyzdy nárse. Biz osyndaı qoldaý úshin rızamyz», - dedi ol.
Foto: press-slýjba Akımata Karagandınskoı oblastı
