Qaraǵandyda jasóspirimge álimjettik jasaý faktisi rastalmady
QARAǴANDY. QazAqparat - Lagerde júrgen balasyna eresek balalar álimjettik jasady dep shaǵymdanǵan qaraǵandylyq áıeldiń aıybyna qatysty fakt tekserildi. Taǵylǵan aıyp rastalmady, dep habarlaıdy «QazAqparat» HAA tilshisi.
«Shaǵymdanýshynyń balasy Tımýr Isabaev kórsetken balalardan, tálimgerlerden túsinikteme alyndy. Lager tárbıelenýshisine qandaı da bir kúsh kórsetilip, psıhıkalyq qysym jasalǵandyǵyn dáleldeıtin eshqandaı derek tabylǵan joq», - dedi «Jezqazǵandyq» balalar lageriniń pelagog-uıymdastyrýshysy Konstantın Tsoı.
«Balalardyń bireýi alańdaǵy toptyq oıyn kezinde júgirip kele jatqan Tımýrdyń aıaǵynan shalǵandyǵyn aıtady. Ol bul áreketti jasaǵandyǵyn moıyndap, oınap istegenin jasyrmaıdy.
Meniń pedagogıkalyq qyzmet atqaryp kele jatqanyma 13 jyl boldy. Buǵan deıin óz ortamyzda bireýge kúsh kórsetilýine jol bergen emespiz. Budan keıin de solaı bola beredi. Úshinshi saýyqtyrý aýysymy tárbıeshileri jáne pelagogtarymen aldaǵy ýaqytta mundaı oqıǵalardyń aldyn alý boıynsha túsindirý jumystary júrgizildi», - dedi Konstantın Tsoı.
Aıta keteıik, 11 jasar Tımýrdyń anasy Lıýdmıla Isabaeva ulyna lagerdegi eresek balalardyń qysym kórsetkendigi jaıly estigennen keıin, balasyn lagerden merziminen buryn alyp ketken.
Lagerge kelgen ana kóp jerinen jaraqattanǵan balasyn medıtsınalyq pýnktte otyrǵanyn kórgen. Tımýrdyń aıtýynsha, joǵary toptaǵy balalardyń biri ony qasaqana aıaǵynan shalǵan.
Oqıǵa bolǵan «Jezqazǵandyq» lageri Aqmola oblysy, Býrabaı aýdanyndaǵy kýrorttyq aımaqta ornalasqan.
