Qaraǵandyda jasandy kógaldy qatty jel ushyryp áketti: eki bala aýrýhanaǵa túsken

QARAǴANDY. QazAqparat - Qaraǵandy qalasynyń Kógildir toǵandary shaǵyn aýdanynda qatty jel ekpini balalar alańyndaǵy kógaldy oınap júrgen eki balamen birge ushyryp túsirdi. Balalar aýrýhanaǵa jetkizildi, dep habarlaıdy QazAqparat tilshisi.

Oqys oqıǵa búgin saǵat 14.00 shamasynda boldy. Qatty jel ekpini oıyn alańyndaǵy jasandy kógaldy julyp áketti. Dál sol ýaqytta onyń ústinde balalar oınap júrgen. Oqıǵa saldarynan eki bala aýrýhanaǵa jetkizildi.

«2015 jyly týǵan bala professor H. J. Maqajanov atyndaǵy klınıkaǵa jetkizildi. Mıynyń aýyr jaraqatymen tústi. Mańdaı súıekteri, bas súıegi jáne bilek súıekteri synǵanyn anyqtadyq. Ol jansaqtaý bólimine jatqyzyldy.

2014 jyly týǵan balanyń mıy shaıqalyp, aldyńǵy qabyrǵasy kógergen, ol oblystyq balalar klınıkalyq aýrýhanasyna jetkizildi. Bólimshege jatqyzyldy», - dep habarlady Qaraǵandy oblysynyń Densaýlyq saqtaý basqarmasy.

Qala ákimi Meıram Kojýhovtyń aıtýynsha, atalmysh oıyn alańy áli paıdalanýǵa berilmegen.

«Búgin qatty jel ekpini Kógildir toǵandar shaǵyn aýdanyndaǵy jasandy kógal jamylǵysyn julyp aldy. Eki bala zardap shekti, qazir olar aýrýhanada jatyr, tekserý júrgizilýde jáne barlyq qajetti medıtsınalyq kómek kórsetilip jatyr.

Bul jasandy kógaldy merdiger uıym ótken aptada tóseı bastaǵan edi. Ol perımetri boıynsha ǵana bekitilgen, biraq paıdalanýǵa berilmegen, sebebi oıyn elementterin ornatý kerek bolatyn. Ata-analardan osyndaı aýa raıynda balalardy qaraýsyz qaldyrmaýyńyzdy suraımyn!

Aýdandardyń eki ákimine barlyq balalar alańdary men kógaldardyń bekitilýin tekserýdi tapsyrdym.

Sonymen qatar, daýyldan birneshe aǵash qulady. Kommýnaldyq qyzmetter olardy jedel túrde jınaıdy.

Butaqtar men qulaǵan aǵashtardy joıý boıynsha aýdan ákimdikteriniń dıspetcherlik qyzmetine habarlasý kerek:

Qazybek Bı 78-01-97

Álıhan Bókeıhan 35-59-16», - dep jazdy qala basshysy Instagram paraqshasynda.