Qaraǵandyda jas qutqarýshylar jarysty
QARAǴANDY. QazAqparat - Qaraǵandyda «Jas qutqarýshy» oblystyq jarysy ótti, dep habarlaıdy QazAqparat tilshisi.
Oqý-jattyǵý jarystaryna Buqar jyraý, Osakarov, Shet aýdandary, Qaraǵandy, Temirtaý, Balqash, Jezqazǵan, Shahtınsk jáne Saran qalalarynan kelgen eń myqty komandalar qatysty.
«Bul jarystar jyl saıyn ótkizilip turady jáne oblysta dástúrge aınalǵan. Qatysýshylar ózin qutqarý jáne basqalarǵa kómek kórsetý daǵdylaryn kórsetedi. Ondaı áreketterge ár adamdy, ásirese balalardy úıretý qajet», - deıdi general-maıor, TJ qyzmetiniń eńbek sińirgen qyzmetkeri, ardager jáne jarystyń qurmetti qonaǵy Meıram Ysqaqov.
Jarys birneshe kezeńnen turady. Komandalar «Jaýyngerlik qanat jaıý», «Tabıǵı orta jaǵdaıyndaǵy izdeý-qutqarý jumystary» jáne «Sý qoımalaryndaǵy qutqarý jumystary» atty úsh dıstantsııadan ótýi tıis.
Qatysýshylar jarysqa daıyndyq kezinde kóp nárseni úırenedi.
«Biz Balqashtan keldik, komandamyzda 10 adam bar. Óz qalamyzda jeńimpaz boldyq jáne búgin oblystyq jarystarǵa kelip otyrmyz. Osy saıysqa 3 apta daıyndaldyq. Órt sóndirý bóliminde jáne Balqash kóliniń jaǵasynda oqý jattyǵýlaryn ótkizdik. Sonymen qatar biz alǵashqy medıtsınalyq kómek kórsetýdi úırendik. Bul daǵdylardyń barlyǵy ómirde paıdasyn tıgizedi. Sonymen qatar, bolashaqta men áskerı nemese qutqarýshy bolǵym keledi», - deıdi Balqash qalasynan kelgen qatysýshy Tólegen Ybraıymbek.
A. Baıtursynov atyndaǵy №41 gımnazııanyń «Jalyn» komandasy 11 qatysýshy-mektepter arasynda eń jaqsy nátıje kórsetip, qalalyq kezeńde jeńiske jetti. «Jalyn» komandasynyń kapıtany Áset Bekmarat oblystyq týrnırde de jeńiske jetetinine senimdi. Qutqarýshylar jarystaryna bul mektep 5 jyl boıy qatysyp keledi.
Saıabaqta sondaı-aq apattyq-qutqarý tehnıkasy men jaraqtarynyń kórmesi ótti. Uıymdastyrýshylardyń aıtýynsha, jarystyń maqsaty - oqýshylardy tótenshe jaǵdaılarda is-qımyl jasaýǵa daıyndaý, azamattyq qorǵaý salasyndaǵy bilimdi nasıhattaý, jastar arasynda qaýipsizdik mádenıetin qalyptastyrý bolyp tabylady.
Jarys qorytyndysy boıynsha barlyq qatysýshylarǵa alǵys hattar, dıplomdar, estelik syılyqtar men medaldar tabys etiledi. Úzdik komanda jeńimpaz kýbogyn alady. Jeke kezeńderde júldeli oryndarǵa ıe bolǵan qatysýshylar qurmet gramotalarymen marapattalady.
