Qaraǵandyda jas bosanǵan 25 áıel alaıaqtyq jasaǵandaryn moıyndady
QARAǴANDY. QazAqparat - Memleketke 71 mıllıon teńge shyǵyn ákelgen jórgekpul alaıaqtyǵy týraly atyshýly is boıynsha sot otyrysy bastaldy, dep habarlaıdy «QazAqparat» HAA tilshisi.
Jas bosanǵan 25 áıel óz aıyptaryn moıyndap, ókinish bildirdi, alaıda sottalýshylardyń barlyǵy bul aıyptaýmen kelispeıdi. Sot oryndyǵynda bala bosanyp, bir rettik járdemaqy men bir jasqa tolǵansha bala kútimine beriletin járdemaqyny joǵarylatylǵan somada alǵan 25 áıelden bólek, Qaraǵandy oblysy Járdemaqy tóleý boıynsha memlekettik ortalyq sektory meńgerýshisi de otyr. Ol qujattardyń jalǵan ekenin bilmedim dep otyr. Jańa zańnamaǵa sáıkes, bosanǵan áıelderden jumys ornynan túpnusqa anyqtamalar jınaý talap etilmeıdi. Kóshirmeleri bolsa jetkilikti. Endi Qaraǵandy qalasy № 1 Qazybek bı aýdandyq sotynyń sýdıasy Manat Jumaqaeva Járdemaqy tóleý boıynsha memlekettik ortalyq sektory meńgerýshisiniń jasandy qujattar týraly bilgen-bilmegenin anyqtaýy tıis. Memlekettik kirister departamenti ekonomıkalyq tergeýler qyzmetiniń nusqasy boıynsha, mundaı ońtaılandyrylǵan qujat jınaý tártibi almatylyq erli-zaıyptylarǵa qaraǵandylyq júkti áıelderdiń tabysy týraly jeke kásipkerlik atynan jalǵan anyqtamalar ázirleýge múmkindik týdyrǵan. Almatylyq er adam ońtústik astanadaǵy «Qazposhta» AQ bólimshesinde mindetti zeınettik jáne áleýmettik jarnalardy tólep turǵan. Osy jalǵan qujattar negizinde qaraǵandylyq bosanǵan áıelder joǵarylatylǵan somada bir rettik járdemaqy men bir jasqa tolǵansha bala kútimine beriletin járdemaqyny joǵarylatylǵan somada alǵan.
Járdemaqy tóleý boıynsha memlekettik ortalyq sektory meńgerýshisinen bólek, «qamaýda ustaý» bultartpaý sharasymen Almaty turǵyny da sot zalynda otyr. Olar AK 159/1 tergeý oqshaýlaǵyshynan sotqa kúzetshi aıdaýymen jetkizildi. Almatylyqtyń áıeline «kepil» bultartpaý sharasy qoldanyldy. Jórgekpuldan alaıaqtyq jasaý úshin júkti áıelderdi izdegen Qaraǵandy turǵynyna da osyndaı shara qoldanyldy. Memlekettik kirister departamenti ekonomıkalyq tergeýler qyzmetiniń nusqasyna súıensek, tórt uıymdastyrýshynyń árqaısysy dekrettik járdemaqydan óz paıyzdaryn - túsken qarajattyń shamamen 10 paıyzyn alyp otyrǵan.
