Qaraǵandyda jartylaı marafonǵa 3 myńnan astam adam qatysty
Eń uzaq qashyqtyq - 21 km 97,5 metrge 143 qatysýshy júgirdi, al 50 erekshe bala 2 shaqyrym qashyqtyqta ózderin synaı aldy.
Jartylaı marafon «Qaraǵandy-Arena» muz saraıy aýdanynda ótti. Tańerteńnen munda júgirýshiler men jankúıerler jınala bastady.
Uıymdastyrýshylar – Qaraǵandy oblysynyń Dene shynyqtyrý jáne sport basqarmasy birneshe qashyqtyqty daıyndady.
Eń uzaq dıstsıplına– 21 km 97,5 m (18 jastan asqan qatysýshylar úshin), odan sál qysqalaýy – 10 km (18 jastan asqan qatysýshylar úshin), 5 km (15 jastan asqan) jáne 2 km (9 jastan 14 jasqa deıin).
Bıyl jarystyń jańa túri – «Ekıden» engizildi. Bul 21 km 97,5 m qashyqtyqqa alty qatysýshyǵa arnalǵan komandalyq estafeta. Birinshi oryndy Karaganda Orienteering komandasy jeńip aldy.
«Bizdiń komandanyń qatysýshylary sporttyq baǵdarlaýmen aınalysady. Jartylaı marafon týraly bilgen soń júgirýdi sheshtik. Aldymen biz eń myqty úshtikte júrdik. Tek sońynda jeńisti julyp aldyq. Nátıjege óte rızamyz. Biz taǵy da qatysamyz», – deıdi komanda jattyqtyrýshysy Janbolat Dáýit.
Áıelder arasyndaǵy eń uzaq qashyqtyqta birinshi oryndy qostanaılyq Tatıana Neroznak ıelendi, al erler arasynda óskemendik Ámir Baıtýqanov jeńimpaz atandy.
«Ótken jyly men Qaraǵandyda 21 km qashyqtyqta jeńiske jettim. Biraq bıylǵy jáne ótken jylǵy joldar ártúrli. Ol kezde men Qaraǵandyǵa qazan aıynda keldim, sýyq boldy. Qazir kún jyly, basqa oryn. Bir nárse ǵana ózgerissiz qalǵan - uıymdastyrý deńgeıi árqashan joǵary. Bizde osyndaı jartylaı marafondar bar ekenine óte qýanyshtymyz. Bul jaqsy tájirıbe. Men mindetti túrde taǵy kelemin», – dedi Tatıana.
Ár qashyqtyqqa qatysýshylar medaldarmen jáne sertıfıkattarmen, jeńimpazdar men júldegerler medaldarmen, baǵaly jáne aqshalaı syılyqtarmen marapattaldy.
