Qaraǵandyda jármeńkede 2 myńnan astam bos jumys orny usynyldy

QARAǴANDY. QazAqparat – 17 naýryzda «Altyn Arba» saýda ortalyǵynda ótken bos jumys oryndary jármeńkesinde eki myńnan astam bos jumys orny usynyldy. Áleýetti jumys berýshiler retinde Qaraǵandynyń 30-dan astam kásiporny men uıymy qatysty, dep habarlaıdy QazAqparat tilshisi.

Jármeńkeni qala ákimdiginiń halyqty jumyspen qamtý ortalyǵy uıymdastyrdy.

Onda mamandar 287 jumys izdeýshige keńes berdi, onyń 67-si jumysqa ornalasýǵa joldama aldy.

Sondaı-aq, is-sharaǵa suranysqa ıe jumys mamandyqtary boıynsha qysqa merzimdi kýrstarda kásiptik daıarlaýdyń bes oqý ortalyǵy qatysty.

Sonymen qatar, jármeńkege kelýshilerge «Jastar tájirıbesi», «Alǵashqy jumys orny», «Kúmis jas», «Áleýmettik jumys oryndary», «Jańa bıznes-ıdeıalardy iske asyrýǵa memlekettik grant berý» jáne basqa jumyspen qamtý salasyndaǵy jobalar týraly aıtyldy.