Qaraǵandyda jańa trıatlon saıabaǵy men shıe baǵy paıda bolady
QARAǴANDY. QazAqparat - Qaraǵandyda jańa trıatlon-parki salynyp, onyń aýmaǵynda shıe baǵy ornalasatyn bolady. Bul týraly oblys ákimdiginiń resmı saıtynda habarlandy.
Málim bolǵandaı, trıatlon saıabaǵy Ońtústik-Shyǵys jáne Maıqudyq shaǵyn aýdandary arasynda salynady. Onda úsh myń aǵash otyrǵyzylady. Bul jumystardy osy jyldyń sáýir aıynda bastap, úsh jyldyń ishinde aıaqtaý josparlanǵan. Sondaı-aq osy ýaqyt ishinde shıe saıabaǵy paıda bolmaq.
«Bul jer serýendeýge arnalǵan saıabaq bolady. Mundaǵy aǵashtar men saıabaqty Qaraǵandy qalasynyń saıabaqtar jáne gúlbaqtar basqarmasy qadaǵalaıdy», - deıdi trıatlon parkiniń joba jetekshisi Darıa Mıhaılıýk.
Demalys ornynda júgirýge jáne velosıped tebýge arnalǵan joldar men fontandar bolady. Ol halyqaralyq standart boıynsha salynady ári bul chempıonattar men jarystar ótkizýge úlken múmkindik.
Oǵan tek sportshylar ǵana emes, qala turǵyndary da baryp demala alady.
Qysta shańǵy joldary men muz aıdyndary jasalady.
Qaraǵandyda trıatlon parkin salý ıdeıasyn «Evrazııa Bıldıng» kompanııasy usyndy. Bul joba-kommertsııalyq emes, jumystar aıaqtalǵannan keıin park qalalyq bılikke tegin tapsyrylady. Ony osy jyldyń qyrkúıek aıynda paıdalanýǵa berý josparlanyp otyr.
