Qaraǵandyda jańa trıatlon saıabaǵy ashylady
QARAǴANDY. QazAqparat - Qaraǵandyda alǵashqy trıatlon saıabaǵy paıda bolady, dep habarlaıdy QazAqparat tilshisi.
Jańa nysannyń qurylysymen oblys ákimi Erlan Qoshanov tanysty. Trıatlon saıabaǵy «Kógildir toǵan» shaǵyn aýdany men Ońtústik-Shyǵys arasynda ornalasatyn bolady.
«Jumystar kezeń-kezeńmen júrip jatyr. Biz qurylys alańyn daıyndadyq, aýmaqty tazaladyq. Qazir biz qajetti ruqsattamalardy alamyz. Jaǵalaý jolaǵyn tazartyp, jaryqtandyrý jumystaryna kirisemiz. Shahterler kúnine qaraǵandylyqtarǵa syılyq jasaý úshin tamyz aıynda qurylysty aıaqtaýdy josparlap otyrmyz», - dedi «Eurasia Building» tobynyń tóraǵasy Aıdos Muhataev.
Trıatlon-saıabaǵynda tartan men asfaltbeton tóselgen uzyndyǵy 5 shaqyrym júgirý jáne velosıped joldary salynady. Júzýge arnalǵan alys jáne qysqa qashyqtyqtarǵa pontondar jabdyqtalady. 100 velosıpedke júre alatyn sport alańy men tranzıttik aımaq, avtoturaq, tennıs korty, qart adamdar men kishkentaı balalary bar analarǵa arnalǵan demalys aımaǵy qarastyrylǵan.
Jańa sport nysanynda halyqaralyq jarystar ótkizýge bolady.
«Salaýatty ómir salty úshin qala turǵyndaryna osyndaı saıabaq qajet. Men joba jaqsy oılastyrylǵanyn, sportpen shuǵyldanýǵa jáne demalýǵa jaqsy jaǵdaı jasalatynyn kórip otyrmyn», - dep atap ótti Erlan Qoshanov.
Aımaq basshysy saıabaqtyń aýmaǵyn múmkindiginshe kóbirek kógaldandyrýǵa usynys bildirdi. Qurylys ornynda 300 aǵash otyrǵyzǵan.
Kompanııa basshysynyń aıtýynsha, jyl sońyna deıin jasyl jelekter sany 10 esege artady.
