Qaraǵandyda jańa sý qubyry magıstrali iske qosylady
QARAǴANDY. QazAqparat – Qaraǵandyda Solnechnaıa kóshesinen «Zapadnaıa» sorǵysh stantsııasyna deıingi jalpy uzyndyǵy 8,4 shaqyrym magıstraldyq sý tartqyshyn qoldanysqa engizý jumystary aıaqtalýǵa jaqyn.
Ol Álıhanov, Erýbaev, Jaýynger-Internatsıonalıster kósheleriniń, Buqar jyraý dańǵyly, Mıhaılovka jáne Aqtas kenti turǵyndaryn sýmen qamtamasyz etetin bolady, dep habarlaıdy QazAqparat tilshisi.
Jańa magıstraldyq sý tartqyshy dıametri 800 mm polıetılen qubyrlarynan jasalǵan, onyń qyzmet etý merzimi – 50 jyl. Qubyrlardy montajdaý tósemdi buzbaıtyn tehnologııa boıynsha arnaıy jabdyqpen oryndalady.
Sý qubyry 120 myń tutynýshyǵa jáne 2 500 zańdy tulǵaǵa qyzmet kórsetedi.
«Qubyrlar men jabdyqtardy montajdaýdyń tehnologııalyq bóligi óte kúrdeli, sebebi ol sý qubyry, káriz, jylý trassalary, kúshtik jáne álsiz toqty jeliler arqyly ǵana emes, sonymen qatar temirjoldar, qalanyń basty kósheleri men alańdary arqyly ótedi. Sonymen qatar, qubyrlardy montajdaý barysynda anyqtalǵan jobadan tys, qosymsha jumystar júrgizýge týra keldi. Іske asyrylyp jatqan jobanyń kúrdeliligi birinshi sanatqa jatady», – dep atap ótti «Qaraǵandy Sý» JShS baspasóz qyzmeti.
