Qaraǵandyda jańa skalodrom salyndy
QARAǴANDY. QazAqparat - «Qaraǵandy Arena» Muz saraıynda jańa qazirgi zamanǵy keshendik skalodrom paıda boldy, dep habarlaıdy Oblys ákiminiń resmı saıty.
Onda bir mezgilde 10 kúrdeli trassany jáne 3 jyldam trassa ornalastyrýǵa bolady. Taǵy bir bólek skalodrom boýlderıngke - birneshe kishigirim kúrdeli trassalardy qysqa úzilistermen ótýge arnalǵan.
Jańa skalodromnyń bıiktigi - 13,7 metr. Ony jabdyqtaýǵa oblystyq bıýdjetten 15 mln teńge bólindi. Paıdalanýǵa ázirge tek eki trassa, biri- jyldamdyqqa, ekinshisi - kúrdeli trassalar daıyn jáne de qosymsha skalodrom boýlderıngke arnalǵan.
- Qalǵan trassalardy biz sońyna deıin jasaımyz. Bir mezgilde, bir birine kedergi keltirmesten jyldamdyqqa jeti adam óte alady. Árıne, mundaı sapaly skalodromnyń paıda bolýy Qaraǵandy oblysynyń Taýǵa shyǵý federatsııasy úshin óte mańyzdy. Osyǵan deıin qalada olardyń sany nebári tórteý ǵana jáne olardyń barlyǵy normalarǵa saı kele qoımaıtyn. Onyń ekeýi - kommertsııalyq, biz jattyǵýlar ótkizý úshin jaldama aqysyn tólep otyrdyq. Qazir jattyǵýlardyń negizgi bóligi osynda, Muz aıdynynda ótedi, - dedi Qazaqstan Respýblıkasynyń taýǵa shyǵý boıynsha joǵary sanatty ulttyq sýdıasy Sáýle Ysqaqova.
Ol taýǵa shyǵý olımpıadalyq sport túrleri tiziminde kelesi jyly Tokıodaǵy Olımpıada Oıyndaryna engiziledi.
- Bizge jyldamdyq, kúrdelilik jáne boýlderıng dıstantsııalarynda óner kórsetý kerek bolady. Qazir biz óz sportshylarymyzdy barlyq úsh túr boıynsha jattyqtyrýǵa múmkindik alyp otyrmyz, - dep qosty ol.
Jańa skalodrom elimizdegi eń úzdikterdiń birine aınaldy. Infraqurylymy iri chempıonattar men saıystar ótkizýge múmkindik beredi.
12 maýsymda jańa skalodromda jasandy bederde Qaraǵandy oblysynyń Taýǵa shyǵý federatsııasynyń ashyq Kýbogy ótti. Saıys Astananyń 20 jyldyǵyna arnaldy.
Búgin taýǵa shyǵý mektebinde bes jattyqtyrýshydan 300-ge jýyq Qaraǵandy men Temirtaýdyń balalary tálim alady.
