Qaraǵandyda jańa óndiris oryndary paıda bolady
Bul nysan jańa ınvestorlardyń, onyń ishinde sheteldik ınvestorlardyń qatysýymen «Qaz Carbon» JShS quıý zaýyttarynyń birlestigi bolyp qaıta ataldy, dep habarlaıdy QazAqparat tilshisi.
Eki jyl buryn kásiporynda aýqymdy jańǵyrtý bastaldy. Kásipkerler 8 mlrd teńgeden astam jeke ınvestıtsııa saldy.
Búgin «Qaz Carbon» JShS koks jáne jartylaı koks, shoıyn jáne bolat ónimderin óndirýmen aınalysady. Kásiporyn 900-den astam bolat jáne shoıyn ónimderin shyǵarady. Zaýyttyń jyldyq jobalyq qýaty 120 myń tonnany quraıdy. Zaýytta 1 216 adam jumys isteıdi. Kompanııada ortasha jalaqy 245 myń teńge. 2019 jyly memleketke 2,1 mlrd teńge salyq tólendi.
Kásiporyndy aralaý barysynda «Qaz Carbon» JShS aktsıoneri Erlan Nyǵmatýlın Premer-mınıstrge osy jyly iske asyryla bastaǵan eki jańa jobany tanystyrdy.
Premer-Mınıstr aglomeratsııalyq fabrıkasy bar jańa ferroqorytpa zaýytynyń jáne kómir baıytý fabrıkasynyń qurylysymen tanysty.
«Aglomeratsııalyq fabrıkasy bar ferroqorytpa zaýytynyń qurylysy» jobasy boıynsha ınvestıtsııa kólemi shamamen 31 mlrd teńgeni quraıdy. Qurylys kezeńinde 1 200-den astam, al iske qosylǵan kezde 400 jańa jumys orny qurylatyn bolady. Jobalyq qýaty 57 myń tonna ferroqorytpa jáne 240 myń tonna aglomeratty quraıdy. Kásiporyn «Indýstrııa 4.0», ekonomıkany tehnologııalyq jańǵyrtý jáne ónerkásipti tsıfrlandyrý baǵdarlamasynyń joǵary parametrlerine jaýap beretin bolady. Zaýyttaǵy barlyq derlik óndiristik protsester avtomattandyrylady jáne biryńǵaı ortalyqtan basqarylady.
Jobanyń ekologııalyq quramdas bóligine erekshe kóńil bólinedi. Zaýytta álemdegi aldyńǵy qatarly gaz tazartý júıesi ornatylǵan jáne aýany tazartýdyń joǵary deńgeıin qamtamasyz etedi.
Sonymen qatar, «Kómir baıytý fabrıkasynyń qurylysy» jobasy aıasynda ınvestıtsııa kólemi 5,2 mlrd teńgeni quraıdy. Jobalyq qýaty – jylyna 1,7 mln tonna kúli az, baıytylǵan kómir shyǵarýǵa qaýqarly. Qurylys kezeńinde 500-den astam, al iske qosylǵanda 110 jańa jumys orny qurylatyn bolady. Tańdalǵan tehnologııanyń biregeıligi, ken baıytý protsesi óńirdiń ekologııasyna áser etpeıtindiginde, sebebi barlyq protsess jabyq ǵımaratta júrgiziledi, onda sýdy aǵartý basseınderi úshin kóp alań qajet emes.
Jańa avtomatıka jáne elektronıka tehnologııalarynyń arqasynda barlyq baıytý protsesin óndiristi basqarý ortalyǵynyń operatory baqylaıtyn bolady.
Osylaısha, «Qaz Carbon» JShS jańa jobalary boıynsha ınvestıtsııalardyń jalpy kólemi 36,2 mlrd teńgeni quraıdy. Jobalar jeke ınvestıtsııalar, onyń ishinde sheteldik ınvestıtsııalar esebinen iske asyrylady. Búgingi kúni daıyn ónimniń barlyq jelisi boıynsha sheteldik seriktestermen ofteık-kelisimsharttarǵa qol qoıyldy. Іs júzinde barlyq ónim eksportqa baǵdarlanatyn bolady.
«Qaraǵandy oblysy dástúrli túrde iri ónerkásiptik aımaq bolyp tabylatynyn, sondaı-aq shıkizat bazasynyń bolýy esebinen úlken áleýetke ıe ekenin eskersek, biz ósýdiń jańa baǵyttaryn tabýǵa múmkindik bar. Bul eń aldymen ozyq tehnologııalar transferti, eńbek ónimdiligin arttyrý, sondaı-aq óńirde jańa jumys oryndaryn ashý úshin jasalyp otyr. Óndiriste 100% otandyq shıkizat qoldanylatyn bolady, bul osy jobalardy iske asyrý kezinde óte mańyzdy artyqshylyq bolyp tabylady», - dedi «Qaz Carbon» JShS aktsıoneri Erlan Nyǵmatýlın.
«Biz búgingi tańda Qazaqstanda iri ınvestıtsııalyq jobalardy júzege asyrýda jetkilikti tájirıbemiz bar. Sondyqtan taıaý jáne alys shetel naryǵynyń qajettiligin, sondaı-aq ishki naryqty zerdelep, jańa jobalardy iske asyrýǵa kiristik. Biz Qazaqstannyń biregeı ınvestıtsııalyq klımaty ǵana emes, sondaı-aq qosylǵan quny joǵary ónimdi jasaý úshin úlken shıkizat bazasy bar ekenine is júzinde kóz jetkizdik», - dep atap ótti «Qaz Carbon» JShS aktsıoneri Davıd Kemertelıdze.
«Qaz Carbon» JShS-niń jańa jobalaryn iske asyrý óńir ekonomıkasyn ártaraptandyrýǵa jáne sońǵy býyn tehnologııalarynyń transferti esebinen eńbek ónimdiligin arttyrýǵa aıtarlyqtaı serpin beredi. Sonymen qatar, aldaǵy jyly qosymsha 500-den astam turaqty jumys orny qurylatyn bolady.
