Qaraǵandyda jańa qoqys jınaý alańdary paıda bolady
QARAǴANDY. QAZAQPARAT - Qaraǵandyda jańa, qazirgi zamanǵa saı qoqys jınaý beketteri paıda bolady. Alańdar tolyǵymen qorshalady, jaryqtandyrylady jáne beınekameralarmen jabdyqtalady, dep habarlaıdy QazAqparat tilshisi.
Jańa qoqys jáshikterin "GorKomTrans" kompanııasy ornatady. Naýqandy Maıqudyqtan bastaý týraly sheshim qabyldandy. Qazir keıbir shaǵyn aýdandarda eski qoqys konteınerleri alynyp tastalyp jatyr. Jańa alańdardyń qaı jerde ornalasatyny týraly habarlandyrý kópqabatty turǵyn úılerdiń kireberisteriniń esikterine jabystyryldy. Jaqyn arada buryn qoqys jáshikteri bolǵan jerlerge olardyń meken-jaılary kórsetilgen taqtaıshalar ornatylady.
Kompanııa qyzmetkerleri qoqysty jınaıtyn jańa pýnktterdi qadaǵalaıdy, turmystyq qaldyqtardy suryptaıdy jáne konteınerlerge iri kólemdi qoqys pen qurylys qoqystaryn jınaýǵa jol bermeıdi.
- Bizdiń adamdar úılerinde qoqysty suryptaıtyn birneshe shelekteri bolǵanyn qalamaıdy. Biraq qazir qoqysty bólek jınaý - zaman talaby. Sondyqtan da biz turǵyndar muny ádetke aınaldyrǵansha, turmystyq qaldyqtardy suryptaýmen aınalysatyn adamdardy jergilikti jerlerde jalǵa alamyz dep sheshtik, - deıdi "GorKomTrans" paıdalaný bóliminiń bastyǵy Regına Slesarýk.
Maıqudyqta jalpy osyndaı 12 pýnkt ornatý josparlanyp otyr - árbir shaǵyn aýdanda bir-birden nemese eki beketten. Jumystar bıylǵy jyldyń naýryz aıynda aıaqtalýy tıis.
Aǵymdaǵy jyldyń tamyz aıynyń sońyna qaraı, eger joba óziniń ózektiligin kórsetip, kommýnaldyq qyzmetterdiń jumysyn jeńildetetin bolsa, osyndaı zamanaýı alańdar qalanyń basqa aýdandarynda da paıda bolady.
Kompanııa ókilderi sonymen qatar, qurylys jáne iri qoqysty bul konteıner alańdaryna tastaýǵa tyıym salynatynyn eskertti. Mundaı qaldyqtardy óz betinshe shyǵarýǵa nemese ol úshin jeke kompanııalardyń ókilderin jaldaýǵa bolady. Іri kólemdi qoqystardy shyǵarýǵa bolatyn polıgondar Doskeı kentinde, «Saryarqa» EEA-da, «Resaıklıng» kompanııasynyń aýmaǵynda jáne burynǵy «Zapadnaıa» shahtasynyń mańynda ornalasady. Sondaı-aq eski jıhaz ben qurylys qoqystaryn «GorKomTrans» kompanııasynyń polıgonyna tapsyrýǵa bolady. Ol úshin kompanııanyń keńsesinde talon alyp, qyzmetin óteý qajet, sodan keıin polıgonǵa joldama alý kerek. Bir tekshe metr qoqys shyǵarý quny 464 teńgeni quraıdy.
Illıýstratsııalyq sýret
