Qaraǵandyda jańa balabaqsha ashyldy

QARAǴANDY. QazAqparat – Qaraǵandy qalasynyń «Kúngeı» shaǵynaýdanynda jańa «Disney 2» balabaqshasy iske qosyldy. Munda bir jastan alty jasqa deıingi balalar qabyldanady, dep habarlaıdy QazAqparat tilshisi.

«Bizdiń baqsha jekemenshik, biraq memlekettik tapsyrys boıynsha 44 oryn qarastyrylǵan. Bizde úsh top bar. Bul - bizdiń ekinshi balabaqshamyz. «Kúngeıde» kóp balaly otbasylar az emes, bir otbasynan bizge 3–4 bala keledi. Analar bizden memlekettik tapsyrys boıynsha oryndardy ulǵaıtýdy suraıdy», – deıdi «Disney 1» jáne «Disney 2» balabaqshalarynyń dırektory Bolat Shákiruly.

Onyń aıtýynsha, jańa mektepke deıingi mekemede 12 adam jumys isteıdi, olardyń kópshiligi jumyspen qamtý ortalyǵy arqyly jumysqa ornalasqan.

Baqsha tolyq jabdyqtalǵan. Onda eki tilde oqytý júrgiziledi.

Muǵalimder men tárbıeshiler ár balanyń jaǵdaıyna qarap, ıkem tabýǵa tyrysady. Munda balalar logopedpen aınalysa alady, aǵylshyn tilin úırenedi.

Taekvondo, horeografııa jáne balalardy erte jastan damytý úıirmeleri jumys isteıdi.

«Biz, Kúngeı turǵyndary, bizde balabaqsha ashylǵanyn bilgende qýandyq. Onda memlekettik tapsyrys boıynsha oryndar bar ekendigi keremet. Bir jastan eki jasqa deıingi balalar úshin kóbirek oryn bolǵanyn qalaımyn», – deıdi Jaınagúl Saıkenova.