Qaraǵandyda zergerlik dúkendi 2,5 mınýtta tonap ketken urylar izdestirilýde
ASTANA. QazAqparat - Qaraǵandy oblystyq ishki ister departamenti «Aıgúl» zergerlik dúkeninen birneshe mıllıon teńgeniń altyn buıymdaryn qoldy qylǵan urylardy izdep jatyr, dep habarlaıdy QazAqparat atalǵan vedomstvoǵa silteme jasap.
«Polıtsııa qylmystyq is qozǵady, kúdiktilerdi anyqtaý jáne ustaýǵa baǵyttalǵan barlyq qajetti sharalar qabyldanyp jatyr. Qylmysty ashý úshin oblystyq ІІD men Qaraǵandy qalalyq ІІB-niń barynsha tájirıbeli qyzmetkerlerinen jasaqtalǵan jedel izdeý toby quryldy. Taıaý aýmaqta ornalasqan barlyq páterlerdiń ıelerinen suraý salynyp, basqa da sharalar júrgizilýde», - dedi departamentten.
Esterińizge sala ketsek, 15 naýryzda Qaraǵandy qalasyndaǵy «Aıgúl» zergerlik buıymdar satatyn dúkenin 3 qaraqshy ne bári 2,5 mınýtta tonap ketken bolatyn. Urylar betperde kıip alǵandyqtan kameradan kim ekendikterin taný qıyn. Qoldaryna qolǵap kıip, bastaryna kenshilerdiń shamyn taǵyp alǵan. Tipti altyndardy alyp ketý úshin úsh sómke ákelgen.
