Qaraǵandyda zergerlik buıym satatyn dúkendi 2,5 mınýtta tonap ketken
ASTANA. QazAqparat - Qaraǵandy qalasyndaǵy «Aıgúl» zergerlik buıymdar satatyn dúkenin qaraqshylar 2,5 mınýtta tonap ketti. 12 mln teńgeniń altyn-kúmisin tez alyp ketken urylardy ustaýǵa jedel toptyń ózi úlgermegen, dep habarlaıdy QazAqparat «eKaraganda» saıtyna silteme jasap.
Qylmys 15 naýryzda túnde jasalǵan. Úsh er adam dúkenniń temir torly terezesin qıratyp ishke kirgen.
«Dúken ishinde qylmyskerler ózderin jınaqy ustaǵan, árqaısysy bir-bir vıtrınadaǵa altyndardy alǵan», - deıdi salon ıesi Aıgúl Muqanova.
Olar betperde kıip alǵandyqtan kameradan kim ekendikterin taný qıyn. Qoldaryna qolǵap kıip, bastaryna kenshilerdiń shamyn taǵyp alǵan. Tipti altyndardy alyp ketý úshin úsh sómke ákelgen.
«Urylarǵa kedergi jasaý úshin kórshi dúkennen er adam júgirip shyqqan, Alaıda olar onyń kózine ballonnan buryshty-gaz shashyp ketken. Iisshil ıt izdi sol mańdaǵy garajǵa sheıin tapty. Sol aradan eki sómke shyqty. Alaıda urylar ishinde 12,6 mıllıon teńgeniń taýary bar sómkeni ala ketken. Onyń ishinde brıllıant buıymdar, erlerdiń altyn saqınasy men alqalar bolǵan», - deıdi kásipker.
Tártip saqshylary beınebaqylaý kamerasynan sońǵy eki aıdaǵy jazbany alyp, zerdelep shyqty. Alaıda kelýshilerdiń kóptigine baılanysty kúdikti adamdar anyqtalmady.
Dúken ıesi kúdiktilerge qatysty qandaı da bir qundy aqparat berilse, ol úshin qomaqty syıaqy berýge ázir ekendigin jetkizdi. Óıtkeni zergerlik buıymdar kepilge óndirýshiden alynǵan, kásipker olardyń qunyn óteýi kerek.
